Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 211 Hüküm no: 197 Orijinal metin no: [26a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cafer Ağa b. Abdurrahman’ın terekesinin vârisler arasında paylaşıldığı Efendi hazretleri imzâsıyla Husûs-ı âti’l-beyânın mahallinde tahrîri iltimâs olunmağın savb-ı şer‘-i celîl-i lâzımü’t-tebcîlde mevlânâ Ömer Efendi b. İsmail irsâl olunup ol dahi dâr-ı hilâfeti’l-aliyye Kostantıniyye el-mahmiyye mahallâtından merhûm Hızır Bey mahallesinde umdetü’l-emâsil ve’l-ekâbir Emrullah Çelebi b. Cafer Ağa’nın menziline varıp zeyl-i rakīmde isimleri terkīm olunan müslimîn mahzarlarında akd-i meclis-i şer‘-i mübîn eyledikde mahalle-i mezbûre sâkinlerinden iken bundan akdem vefât eden Cafer Ağa b. Abdurrahman’ın verâseti zevce-i metrûkesi fahrü’l-muhadderât Âişe Hâtun bt. Mehmed Efendi ile sulbî kebîr oğlu mûmâ-ileyh Emrullah Çelebi ve sulbiye kebîre kızı Nazife Hâtun’a münhasıra olup ba‘dehû merkūme Nazife Hâtun dahi fevt olup verâseti vâlidesi müşârün-ileyhâ Âişe Hâtun ile li ebeveyn karındaşı mûmâ-ileyh Emrullah Çelebi’ye münhasıra olduğu şer‘an mütehakkik oldukdan sonra müşârün-ileyhâ Âişe Hâtun zâtı ma‘rifet-i şer‘iyye ile ârifân olup mahalle-i mezbûre sâkinlerinden fahrü’l-eşbâh Yusuf Ağa b. Mehmed ve mahmiye-i mezbûrede Üsküblü mahallesi sâkinlerinden umdetü’l-a‘yân Esad Çelebi b. Mesud nâm kimesneler ta‘rîfleri ile mu‘arrefe oldukdan sonra meclis-i ma‘kūd-ı mezbûr ve tereke-i müteveffâ-yı mezbûra vâzı‘ü’l-yed olan sulbî kebîr oğlu mûmâ-ileyh Emrullah Çelebi mahzarında bi’t-tav‘i’s-sâf ikrâr ve ve i‘tirâf edip tereke-i müteveffâ-yı mezbûrun akārât ve menkūlât ve nukūdundan bi tarîki’l-münâsahati’ş-şer‘iyye benim hisse-i irsiyye-i şer‘iyyeme isâbet eden kalîl ü kesîr ve celîl ü hakīr eşyâmı bi’t-tamâm ve’l-kemâl alıp kabz edip tereke-i müteveffâ-yı mezkûra müte‘allika âmme-i de‘âvî ve mütâlebâtdan ve sâir hukūk-ı ma‘lûme ve mechûle da‘vâsından oğlum mûmâ-ileyh Emrullah Çelebi’nin zimmetini ibrâ-i âmm-ı kātı‘ü’n-nizâ‘ ile ibrâ eyledim dedikde gıbbe’t-tasdîki’ş-şer‘î husûs-ı mezbûru mevlânâ-yı mezbûr mahallinde tahrîr ba‘dehû ma‘an irsâl olunan İbrahim Çelebi b. Ahmed ile meclis-i şer‘-i hatîre gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min Cumâdelûlâ li sene seb‘a ve seb‘în ve elf. Şuhûdü’l-hâl: Fahrü’l-akrân Ebussuûd Çelebi b. Mesud, Seferikoz mahallesi İmâmı Mehmed Efendi b. Mustafa, Hüseyin Çelebi b. Cafer, Bâli Bey b. Mehmed.