Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 210 Hüküm no: 196 Orijinal metin no: [26a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âmine bt. el-Hâc Ali’nin kocası İbrahim’den mehr-i müeccelini bin akçe dışında tahsil ettiği Mahmiye-i İstanbul’da Haraçcı Muhyiddin mahallesi sâkinelerinden Âmine bt. el-Hâc Ali nâm hâtun tarafından husûs-ı âti’l-beyâna vekîl olup mezbûrenin zâtını ma‘rifet-i şer‘iyye ile ârifân mahalle-i mezbûre İmâmı Ahmed Efendi b. Ramazan ve Mehmed b. Abdülkādir nâm kimesneler şehâdetleriyle şer‘an vekâleti sâbite olan Ali Çelebi b. Ahmed nâm kimesne meclis-i şer‘-i şerîfde müvekkile-i mezbûre Âmine’nin hâlâ zevci işbu bâ‘isü’l-kitâb İbrahim b. Şeyh Mehmed nâm kimesne mahzarında bi’l-vekâle ikrâr-ı tâm ve ta‘bîr ani’l-merâm edip mezbûr İbrahim zimmetinde mütekarrir ve ma‘kūdun-aleyh olan on bin akçe mehr-i müeccelinden dokuz bin akçesini müvekkilem mezbûre Âmine’ye teslîm ol dahi meblağ-ı mezbûru merkūm İbrahim yedinden ahz u kabz ve tesellüm edip meblağ-ı mezbûr on bin akçeden bâkī zimmetinde bin akçeden mâ‘adâ âmme-i de‘âvîden her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Cumâdelûlâ li sene seb‘a ve seb‘în ve elf. Şuhûdü’l-hâl: Ahmed Efendi b. Bâli, Hamamcı Ahmed Ağa, el-Hâc Ali b. İsmail, Mustafa Çelebi b. Mehmed, Süleyman b. Hasan.