Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 142 Hüküm no: 133 Orijinal metin no: [20b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Komyoni’nin kaybolan atının bulunması Râfi‘ü’l-kitâb Yani v. Komyoni nâm zimmî mahfil-i kazâda Havâss-ı Aliyye kazâsı müzâfâtından Terkos nâhiyesi tevâbi‘inden Pinhor nâm karyede vâki‘ Ferhad Paşa Çiftliği demekle ma‘rûf çiftlikde bostancı olan Yorgi v. Yani nâm zimmîyi ihzâr ve mahzarında üzerine takrîr-i da‘vâ edip işbu hâzır bi’l-meclis olup alnı sakar ensesinin sol tarafında beyaz elif gibi beni ve çenesinin iki tarafında dağ alâmeti olan al bârgir mülk-i sarîhim iken târih-i kitâbdan iki sene mukaddem İstinye karye[sinde] Müftü çayırı demekle ma‘rûf çayırda çayırlarken sirkat olunmuş idi hâlâ mezbûr Yorgi’nin yedinde buldum suâl olunup şer‘an ihkāk-ı hak olunmak matlûbumdur dedikde gıbbe’s-suâl mezbûr Yorgi cevâbında, zikr olunan bârgiri on gün mukaddem kasaba-i Kasım Paşa’da bakkal olan Dimitri v. ( ) nâm zimmîden bin iki yüz akçeye iştirâ eyledim mezbûrun mülkü olduğu ma‘lûmum değildir deyicek mezbûr Yani’den da‘vâsına mutâbık beyyine taleb olundukda Rizo v. Dimo ve Todori v. Yorgi nâm zimmîler li ecli’ş-şehâde meclis-i şer‘a hâzırân olup istişhâd olunduklarında, fi’l-hakīka evsâf-ı mezkûre ile mevsûf olan al bârgir târih-i kitâbdan iki sene mukaddem mezbûr Yani’nin mülkü iken karye-i mezbûrede memleketinden sirkat olunmuş idi biz bu husûsa şâhidler[iz], şehâdet dahi ederiz dediklerinde gıbbe ri‘âyeti şerâiti’l-kabûl şehâdetleri hayyiz-i kabûlde vâki‘ oldukdan sonra zikr olunan bârgiri âhara bey‘ ve hibe eylemediğine ve vech-i şer‘iyyeden bir vechile mülkünden ihrâc eylemediğine mezbûr Yani’ye yemîn teklîf olundukda alâ vefki’l-mes’ûl yemîn billâhi’llezî enzele’l-İncîle alâ İsa etmeğin zikr olunan bârgir mezbûr Yani’ye hükm olunup mâ vaka‘a gıbbe’t-taleb ketb olundu. Tahrîren fi’l-yevmi’t-tâsi‘ aşer min Recebi’l-ferd li sene seb‘a ve erba‘în ve elf. Şuhûdü’l-hâl: Mustafa Efendi el-Müderris, Siyâmi b. Tahir, Mahmud b. Ahmed, Yakub b. Kurd, Mustafa b. Veli ve gayruhüm.