Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 142 Hüküm no: 134 Orijinal metin no: [20b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani, Angilaki, Dimitri, Yorgo ve Mihal’in Kokana bt. Kostantin’e borçlu oldukları Mahmiye-i Kostantıniyye sûru ebvâbından Eyyûb-i Ensârî kapısı dâhilinde vâki‘ Mustafa Paşa mahallesinde sâkin Yani v. Vero ve Angilaki v. Dimitri ve Yorgo v. Mihal ve Mihal v. Yani nâm zimmîler mahfil-i kazâda işbu râfi‘ü’l-kitâb mahalle-i mezbûrede sâkine Kokana bt. Kostantin nâm Nasrâniye tarafından ikrâr-ı âti’z-zikri tasdîka vekîl olup vekâleti hasm-ı câhid mahzarında Todori v. Manol ve Sofyanos v. Kiryaki nâm zimmîler şehâdetleri ile şer‘an sâbite olan Yamandi v. Yanaki muvâcehesinde her biri ikrâr ve i‘tirâf edip mezbûre Kokana’ya cihet-i karzdan her birimizin zimmetinde ikişer bin akçe ki cem‘an sekiz bin nakd-i râyic fi’l-vakt fıddî akçe lâzımü’l-edâ ve vâcibü’l-kazâ deynimiz vardır dediklerinde [21a] mukırrûn-ı merkūm[ûn]un vech-i muharrer üzre cârî ve sâdır olan ikrâr ve i‘tirâfları vekîl-i merkūm Yamandi vicâhen tasdîk ve şifâhen tahkīk eyledikden sonra merkūmûn Yani ve Angilaki ve Yorgo ve Mihal meblağ-ı mezbûr sekiz bin akçeden her birinin zimmetinde edâsı lâzım olan ikişer bin akçeyi târih-i kitâbdan otuz gün tamâmına değin mezbûre Kokana’ya edâya müte‘ahhidler olmağın mâ hüve’l-vâki‘ gıbbe’t-taleb ketb olundu. Fi’l-yevmi’l-ışrîn min Recebi’l-ferd li sene seb‘a ve erba‘în ve elf. Şuhûdü’l-hâl: Mustafa Beşe b. Mehmed, Ali Çelebi b. Hamza, Yakub b. Kurd, Mustafa b. Mehmed, Mahmud b. Ahmed, Yani v. Yorgi, Yorgi v. Nikola, Nikola v. Yani, Kiraye v. Kiryaki, Verano v. Kiryaki.