Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 153 Hüküm no: 151 Orijinal metin no: [23b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime Hatun bt. Mustafa Çavuş’un evini Halil ve Mehmed b. Murtaza’ya sattığı Medîne-i Hazret-i Ebî Eyyûb el-Ensârî mahallâtından Ali Paşa-yı Cedîd mahallesinde sâkine Rahime Hâtun bt. Mustafa Çavuş mahfil-i kazâda sulbiye kızı oğulları râfi‘ân-ı hâze’l-kitâb Halil ve Mehmed b. Murtaza muvâcehelerinde bi tav‘ihâ ikrâr ve i‘tirâf edip işbu akdin sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafdan vakıf menzil ve bir tarafdan Cafer Çelebi vakfı bostan ve bir tarafdan Ali Paşa vakfı olan bostan ve taraf-ı râbi‘den yine kendi mülküm ile mahdûd ve mümtâz dört bâb tahtânî ve bir bâb fevkānîyi ve bi’r-i mâyı ve kenîfi ve zât-ı eşcâr-ı müsmire ve gayr-ı müsmire bahçeyi müştemil mülk menzilimi, kızım oğulları mezbûrân Halil ve Mehmed’e fıddî râyic fi’l-vakt yirmi bin akçeye bey‘-i bâtt-ı sahîh-i şer‘î ile bey‘ edip onlar dahi vech-i meşrûh üzre iştirâ ve kabûl eylediklerinden sonra kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm menzil-i mahdûd-ı merkūm mezbûrân Halil ve Mehmed’in ale’l-iştirâki’s-seviy mülk-i müşterâları olmuşdur, keyfe mâ yeşâ’ mutasarrıf olsunlar dedikde mukırr-ı merkūme Rahime Hâtun’un ikrâr-ı meşrûhunu el-mukarru lehüme’l-merkūmân Halil ve Mehmed vicâhen tasdîk ve şifâhen tahkīk edicek mâ vaka‘a gıbbe’t-taleb ketb olundu. Hurrire fi’l-yevmi’t-tâsi‘ ve’l-ışrîn min Recebi’l-ferd li sene seb‘a ve erba‘în ve elf. Şuhûdü’l-hâl: Veli Efendi b. Abdullah, Mehmed Çelebi b. ( ) el-İmâm, Mehmed b. Hasan el-Müezzin, Mehmed Çelebi b. Murad, İbrahim [b.] Mehmed, Mustafa Halîfe b. Mehmed el-Mu‘allim, Avnullah b. Mustafa, Abdülkerim b. Mehmed, Ömer b. Musli, Cafer b. Abdullah ve gayruhüm.