Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 212 Hüküm no: 199 Orijinal metin no: [26b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime Hatun bt. Ramazan Ağa’nın câriyesi İsmihan’ı âzat ettiği Mahmiye-i İstanbul’da Dülgerzâde mahallesinde sâkine Rahime Hâtun bt. Ramazan Ağa tarafından husûs-ı âti’l-beyâna vekîl olduğu merkūmenin zâtını ma‘rifet-i şer‘iyye ile ârifân olup mahalle-i mezkûre sükkânından Yusuf b. Mehmed ve Mehmed Bey b. Bayram nâm kimesneler şehâdetleri ile şer‘an sâbit olan Ali Efendi b. İbrahim nâm kimesne meclis-i şer‘-i hatîr-i lâzımü’t-tevkīrde bi’l-vekâle ikrâr ve takrîr-i kelâm edip müvekkilem mezbûre Rahime Hâtun rıkkıyyetini kendiye mu‘terife olan uzun boylu, açık kaşlı, koyun elâ gözlü, Rûsiyyetü’l-asl bâ‘isetü’l-kitâb İsmihan bt. Abdullah nâm câriye-i memlûkesini hasbeten lillâhi’l-Hallâk tahrîr ve i‘tâk ve silk-i harâir-i asliyyâta idrâc ve ilhâk eyledi ba‘de’l-yevm mevsûfe-i mezkûre sâir harâir-i asliyyât gibi hürre olup üzerinde velâ-i şer‘îden gayrı hakkı kalmadı dedikde vâki‘ü’l-hâl bi’t-taleb ketb olundu. Fî gurreti Cumâdelâhire li sene seb‘a ve seb‘în ve elf. Şuhûdü’l-hâl: Ahmed Çelebi b. ( ) Sarrâc, Hacı Ali el-Kayyım, Mustafa Halîfe el-Kayyım, Mehmed Çelebi b. Mustafa, Şükrullah Bey.