Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 213 Hüküm no: 200 Orijinal metin no: [26b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman’ın evini kardeşi Ali’ye sattığı Vilâyet-i Rumeli’nde İstarova kazâsına tâbi‘ Seliçe nâm karye sükkânından iken bundan akdem vefât eden Hasan nâm kimesnenin verâseti sulbî kebîr oğulları Osman ve Ali ve Hüseyin ve Mehmed nâm kimesnelere münhasıra olduğu şer‘an zâhir ve mütehakkik oldukdan sonra mezbûr Osman meclis-i şer‘de karındaşı bâ‘isü’l-vesîka mezkûr Ali mahzarında ikrâr ve takrîr-i kelâm edip babam müteveffâ-yı merkūm Hasan’ın muhallefâtından olup karye-i mezkûrede vâki‘ bir tarafdan Hüseyin b. Mahmud mülkü ve bir tarafdan Demirci Mustafa mülkü ve bir tarafdan Hüseyin nâm kimesne mülkü ve bir tarafdan tarîk-i âm ile mahdûd bir bâb oda ve bir ahır ve bir samanlık ve bir mülk harman yeri ve zât-ı eşcâr-ı müsmire ve gayr-ı müsmire hadîkayı ve havluyu müştemil menzilden bi’l-irsi’ş-şer‘î bana isâbet eden rub‘ hisse-i şer‘iyyemi tarafeynden îcâb ve kabûlü hâvî bey‘-i sahîh-i kat‘î ile karındaşım merkūm Ali’ye iki bin yedi yüz nakid râyic fi’l-vakt akçeye bey‘ edip ol dahi vech-i muharrer üzre iştirâ ve kabûl eyledikden sonra semeni olan meblağ-ı mezbûr iki bin yedi yüz akçeyi merkūm Ali yedinden tamâmen alıp kabz edip menzil-i mahdûd-ı mezbûra vech-i mübeyyen üzre olunan rub‘ hisseyi mahallinde zabt ve tasarrufa merkūm Ali’yi taslît eyledim min ba‘d benim alâka ve medhalim kalmadı dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min Cumâdelûlâ li sene seb‘a ve seb‘în ve elf. Şuhûdü’l-hâl: Hüseyin b. Ali, Ali b. Ali, İsmail b. Mustafa, Ali b. Abdullah, Ahmed Beşe b. ( ).