Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 154 Hüküm no: 153 Orijinal metin no: [23b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Handan Hatun bt. Abdullah ile eski kocası Ahmed Beşe b. Abdullah’ın alacak davasında sulh oldukları Medîne-i Hazret-i Ebî Eyyûb el-Ensârî mahallâtından Evlice Baba mahallesinde sâkine Handan Hâtun bt. Abdullah tarafından sulh-i âti’z-zikre vekîl olup mezbûre Handan’ı ma‘rifet-i şer‘iyye ile ârifeyn Mahmud Efendi b. Mehmed el-İmâm ve el-Hâc Mustafa b. Veli ve Mehmed b. Yusuf nâm kimesne şehâdetleri ile şer‘an sâbite olan zevci Halil b. Hasan nâm kimesne mahfil-i kazâda işbu râfi‘ü’l-kitâb mezbûre Handan’ın zevc-i mutallıkı olan Ahmed Beşe b. Abdullah mahzarında bi’l-vekâle ikrâr ve takrîr ke[lâ]m edip zevcem müvekkile-i mezbûre Handan’ın sâbıkan mezbûr Ahmed Beşe yediyle Havâss-ı Aliyye kazâsı müzâfâtından Cebeci nâm karyede sâkin Hızır b. Abdullah nâm kimesneye alâ tarîki’l-karz verilen altı bin akçesi ve zimmetinde mütekarrir olan üç bin akçe mehr-i müeccelini vekâlet-i mahkiyem hasebiyle mezbûr Ahmed Beşe’den taleb ve da‘vâ eylediğimde beynimizde münâza‘ât-ı kesîre ve muhâsamât-ı adîde vâki‘ olmuşidi el-hâletü hâzihî es-sulhu seyyidü’l-ahkâm muktezâsınca muslihûn tavassut edip mâbeynimizi merkūm Hızır Beşe zimmetinde olan meblağ-ı mezbûr altı bin akçeden beş bin beş yüz akçe üzerine sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr beş [bin] beş yüz akçeyi merkūm Hızır Beşe’den kabûl edip husûs-ı mezbûra ve zevciyyete müte‘allik da‘vâ [ve] husûmâtdan mezbûr Ahmed Beşe’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim ba‘de’l-yevm husûs-ı mezbûra müte‘allik benden bi’l-vekâle veya müvekkilem mezbûre Handan’dan bi’l-asâle da‘vâ sudûr ederse inde’l-hükkâmi’l-kirâm mesmû‘a o[lmaya] dedikde gıbbe’t-tasdîki’ş-şer‘î mâ vaka‘a ketb olundu. Tahrîren fi’l-yevmi’s-sâmin ve’l-ışrîn min Recebi’l-ferd li sene seb‘a ve erba‘în ve elf. Şuhûdü’l-hâl: Hasan b. Mehmed, Habib b. Ali, Mehmed b. Hüdâverdi, Receb Efendi b. Abdullah, Mahmud b. Ahmed, Yakub b. Kurd, Mustafa b. Veli Hızır b. Abdullah ve gayruhüm.