Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 178 Hüküm no: 186 Orijinal metin no: [29b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasap Avram v. Dimitri’nin yanında çalışmış olan İsmail b. Osman’a hizmet bedelini ödemesi Medîne-i Hazret-i Ebî Eyyûb el-Ensârî mahallâtından Takyecibaşı mahallesi sâkinlerinden işbu hâmilü’l-kitâb İsmail b. Osman nâm kimesne meclis-i şer‘a Avram v. Dimitri nâm kasab zimmîyi ihzâr ve mahzarında üzerine takrîr-i da‘vâ edip mezbûr Avram beni selhhânesinde hizmet etmek üzre bir senede iki bin akçe ücret ile istîcâr edip ben dahi vech-i meşrûh üzre bir sene mezbûr Avram’ın selhhânesinde hizmet edip itmâm-ı hizmet eylediğimden sonra meblağ-ı merkūmun bin akçesini verip zimmetinde bin akçe hakkım kalmışdır suâl olunup şer‘an alıverilmek matlûbumdur dedikde gıbbe’s-suâl mezbûr Avram cevâbında, fi’l-vâki‘ zimmetimde ücretinden iki bin akçe hakkı var idi lâkin meblağ-ı mezbûru bi’t-tamâm mezbûr İsmail’e edâ ve teslîm eyledim dedikde gıbbe’s-suâl mezbûr İsmail iki bin akçeden ziyâde aldığın inkâr edip mezbûr Avram’ın iki bin akçeyi edâya beyyine[si] olmamağla, mezbûr İsmail istihlâf etmeğin mezbûr İsmail meblağ-ı mezbûr iki bin akçeden bin akçeden ziyâde kabz eylemediğine yemîn billâhi’l-aliyyi’l-azîm edicek meblağ-ı bâkī bin akçeyi mezbûr İsmail’e edâya mezbûr Avram’a tenbîh birle mâ vaka‘a bi’t-taleb ketb olundu. Tahrîren fi’l-yevmi’s-sâlis aşer min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Ali b. Mustafa, Mahmud b. Ahmed, Mustafa b. Veli, Cafer b. Abdullah, Mustafa Beşe b. Mahmud, Mustafa b. Mehmed ve gayruhüm.