Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 177 Hüküm no: 185 Orijinal metin no: [29a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emetullah bt. İdris’in çiftlik ve tarlalarını Mehmed Çavuş b. Mustafa’ya sattığı Mahmiye-i İstanbul’da merhûm Mahmud Paşa câmi‘-i şerîfi kurbunda vâki‘ merhûm-ı mezbûrun hucurâtından birinde sâkine olan Emetullah bt. İdris Ağa nâm hâtun tarafından husûs-ı âti’l-beyânı ikrâra vekîl olup hasm-ı câhid mahzarında mezbûreyi ma‘rifet-i şer‘iyye ile ârifân İbrahim Efendi b. Mehmed ve Mehmed Halîfe b. Ömer şehâdetleri ile şer‘an vekâleti sâbite olan ammisi İsa Bey b. Abdülkerim mahfil-i kazâda işbu râfi‘ü’l-kitâb Mehmed Çavuş b. Mustafa mahzarında bi’l-vekâle ikrâr-ı tâm ve takrîr-i kelâm edip müvekkile-i mezbûre Havâss-ı Aliyye kazâsı müzâfâtından Küçükçekmece nâhiyesine tâbi‘ Kara Ahmedli nâm karyede vâki‘ iki tarafı İsmihan Hâtun mülkü ve bir tarafı Mehmed Bey b. Hüseyin mülkü ve bir tarafı tarîk-i âm ile mahdûd iki bâb tahtânî beyti ve ahırı ve sundurmayı ve eşcâr-ı müsmire-i mütenevvi‘ayı hâviye cüneyneyi müştemil çiftlik ta‘bîr olunur mülk menzilini, cümle tevâbi‘ ve levâhıkı ile mezbûr Mehmed Çavuş’a tarafeynden îcâb ve kabûlü hâvî bey‘-i bâtt-ı sahîh-i şer‘i ile altı bin nakd-i râyic fi’l-vakt fıddî akçeye bey‘ ve teslîm edip ol dahi vech-i meşrûh üzre iştirâ ve tesellüm eyledikden sonra yine çiftlik-i mezbûr kurbunda mevâzi‘-i adîdede vâki‘ inde’l-ahâlî ve’l-cîrân her biri ma‘lûmü’l-hudûd olan tahmînen on müd tohum istî‘âb eder tarlalarının dahi hakk-ı tasarruflarını sâhib-i arz ma‘rifetiyle merkūm Mehmed Çavuş’a üç bin altı yüz mezbûrü’n-na‘t akçe mukābelesinde tefvîz edip ol dahi tefevvuz ve kabûl eyledikden sonra mukābele-i tefvîzde olan meblağ-ı merkūm üç bin altı yüz akçe ile menzil-i mezbûrun semeni olan altı bin akçe ki cem‘an dokuz bin altı yüz akçeyi yedinden bi’t-tamâm ve’l-kemâl ahz ve kabz eyledi ba‘de’l-yevm çiftlik-i mezbûrda müvekkile-i mezbûrenin alâka ve medhali kalmayıp mezbûr Mehmed Çavuş’un mülk-i müşterâsı ve zikr olan tarlalar dâhil-i taht-ı tasarrufu olmuşdur dedikde vekîl-i mezbûrun vech-i muharrer üzre cârî olan ikrârını el-mukarru lehü’l-merkūm Mehmed Çavuş bi’l-vekâle vicâhen ve şifâhen tasdîk ve tahkīk etmeğin mâ hüve’l-vâki‘ gıbbe’t-taleb ketb olundu. Fi’l-yevmi’s-sâlis aşer min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Ramazan Efendi b. Mehmed el-İmâm, Receb Efendi b. Mustafa el-Müezzin, Hasan Bey b. Memi, Hasan Beşe b. Ömer, Mustafa Beşe b. Sefer, Mehmed Çavuş b. Mustafa, Hasan b. Abdullah ve gayruhüm.