Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 207 Hüküm no: 229 Orijinal metin no: [38a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf b. Kasım’ın ev ve tarlalarının yarısını oğlu Derviş Beşe’ye sattığı Vilâyet-i Rumeli’nde İstarova kazâsına tâbi‘ Aneste nâm karye sâkinlerinden Yusuf b. Kasım nâm kimesne meclis-i şer‘-i hatîr-i lâzımü’t-tevkīrde işbu hâmilü’l-kitâb sulbî kebîr oğlu Derviş Beşe mahzarında bi’t-tav‘i’s-sâf ikrâr ve i‘tirâf edip karye-i mezbûrede vâki‘ bir tarafdan Ali Bey mülkü ve bir tarafdan Mustafa Beşe mülkü ve bir tarafdan Bayram b. Hasan mülkü ve bir tarafdan tarîk-i âm ile mahdûd bir bâb tahtânî beyti ve bir kileri ve bir samanlık ve eşcâr-ı müsmire ve gayr-ı müsmire hadîkayı ve bostan yerini müştemil mülk menzilden nısf-ı şâyi‘ini, mezbûr Derviş’e fıddî nakd-i râyic fi’l-vakt bin beş yüz akçeye bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve kabûl eyledikden sonra yine karye-i mezbûre hudûdu dâhilinde lede’l-ahâlî ma‘lûmü’l-hudûd iki dip ceviz ağacını müştemil iki kıt‘a çayır sekiz kıt‘a tarladan dahi nısf-ı şâyi‘ini, sâhib-i arz ma‘rifetiyle mezbûr Derviş’e yedi yüz akçe mukābelesinde tefvîz edip ol dahi vech-i meşrûh üzre tefevvuz ve kabûl eyledikden sonra semen-i mezbûr bin beş yüz akçe ile bedel-i tefvîz olan yedi yüz akçe ki cem‘an iki bin iki yüz akçe ile vilâyet-i mezbûrede beynimizde ma‘lûm bazı kimesnelere olan iki bin iki yüz akçe deynimizi edâya mezbûr Derviş’i tevkîl eylediğimden sonra zikr olunan menzil ve tarlaların nısflarını mahallinde zabt ve kabz ve tasarrufa mezbûr Derviş’i taslît eyledim ba‘de’l-yevm menzil-i mezbûrun nısfı merkūm Derviş’in mülk-i müşterâsı ve tarlaların nısfı dâhil-i taht-ı tasarrufu olmuşdur dedikde gıbbe’t-tasdîki’ş-şer‘î mâ vaka‘a ketb olundu. Fi’l-yevmi’s-sâlis aşer min Recebi’l-ferd târihuhu’l-mezbûr. Şuhûdü’l-hâl: İlyas b. Ahmed, Hasan b. Süleyman, Hüseyin b. Abdullah, Ahmed b. Süleyman, Osman b. Davud, Bayram [b.] Hasan, Mehmed b. ( ), Hüseyin b. Hasan ve gayruhüm.