Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 206 Hüküm no: 228 Orijinal metin no: [37b-4, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Mustafa’nın istiğlâl yoluyla evini Mustafa Çavuş Vakfı’na sattığı Mahmiye-i Kostantıniyye mahallâtından el-Hâc İsa mahallesinde sâkine olan Âişe bt. Mustafa nâm hâtun âtiyyü’z-zikr menzilini merhûm Mustafa Çavuş vakfı’na mütevellî olan hâmil-i hâze’l-kitâb Mehmed Çelebi b. Ramazan’a bey‘ ettiğini ikrâr ve i‘tirâf etti. Mütevellî-i mezbûr da vakf-ı mezbûr malıyla ve istiğlâl maksadıyla, mezbûre Âişe hâtunun işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu mahalle-i merkūmede kâin bulunan bir tarafdan Hüseyin Beşe mülkü, iki tarafdan Mihri Hâtun mülkü, diğer tarafdan da tarîk-i hâs ile mahdûd cemî‘-i menzilini cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt, iki bin akçe semen-i mu‘ayyen-i makbûzla iştirâ etti. Bâyi‘a-i mezbûrenin menzili kirâlamak istemesi üzerine mütevellî-i merkūm, ba‘de’t-tahliyye ve’t-tekābuz zeylde mezkûr Cumâdelûlâ ayının gurresinden üç sene tamâmına dokuz [yüz] akçe ücret ile menzil-i mezbûru kirâya verdi. Mütevellî-i mezbûr, vâki‘ ikrârı vicâhen ve şifâhen tasdîk etti. Sonra Şaban b. Receb ve Mihri bt. Ali ve Fâtıma bt. Abdullah nâm kimesnelerin her biri menzil-i mezbûrun derkine ve ücret-i merkūmeye îcâb ve kabûlü hâvî kefâletle kefîl oldu. Cerâ zâlike ve hurrire fi’l-yevmi’s-sâbi‘ min şehri Recebi’l-ferd sene seb‘a ve erba‘în ve elf. Şuhûdü’l-hâl: Fahrü’l-müderrisîn Ahmed Efendi, Hüseyin Çelebi b. Ahmed, Şeyhî Çelebi b. Hüseyin, Selim b. Abdullah, Mustafa b. Yusuf, Murtaza Halîfe b. Mehmed, Murad Halîfe b. Mehmed, Hasan Efendi ve gayruhüm