Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 213 Hüküm no: 237 Orijinal metin no: [39a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zeyneb bt. Ali’nin Fâtıma bt. Mehmed’deki alacağını tahsil ettiği Havâss-ı Aliyye kazâsı müzâfâtından Terkos nâhiyesine tâbi‘ Akpınar nâm karyede sâkin iken fevt olan Hüseyin b. ( ) nâm müteveffânın verâseti zevce-i metrûkesi Zeyneb bt. Ali nâm hâtuna ve kız karındaşı kızı olup zî-rahm cihetinden vârisesi olan Fâtıma bt. Mehmed nâm hâtuna münhasıra olduğu mütehakkik oldukdan sonra mezbûre Zeyneb Hâtun mahfil-i kazâda merkūme Fâtıma Hâtun muvâcehesinde bi tav‘ihâ ikrâr ve i‘tirâf edip zevcem müteveffâ-yı mezbûrun metrûkâtından bi hasebi’l-irsi’ş-şer‘î bana isâbet eden rub‘ hisse-i şer‘iyyemi bi tamâmihî alıp kabz eyledikden sonra müteveffâ-yı mezbûrun zimmetinde mütekarrir olan üç bin akçe mehr-i müeccelimi dahi taleb eylediğimde beynimizde münâza‘ât ve muhâsamât vâkı‘a olmuşidi el-hâletü hâzihî muslihûn tavassut edip mâbeynimizi müteveffâ-yı merkūmun metrûkâtından karye-i mezbûrede vâki‘ bir tarafdan Şaban nâm kimesne mülkü ve bir tarafdan diğer Şaban b. Mehmed mülkü ve bir tarafdan Zâhide nâm hâtun ve taraf-ı râbi‘den tarîk-i âm ile mahdûd bir bâb tahtânî beyti ve bir ahırı ve bir kıt‘a bağı müştemil mülk menzil üzerine sulh ettiklerinde ben dahi sulh-i mezbûru kabûl ve bedel-i sulh olan menzil-i mezbûru alıp kabz eyledim min ba‘d zevcim müteveffâ-yı mezbûr metrûkâtına müte‘allik da‘vâ ve talebim yokdur. Eğer ba‘de’l-yevm benden bi’l-asâle ve bi’l-vekâle da‘vâ dahi sudûr ederse lede’l-hükkâm mesmû‘a olmasın dedikde gıbbe’t-tasdîki’ş-şer‘î mâ vaka‘a ketb kayd olundu. Hurrire fi’l-yevmi’s-sâbi‘ aşer min Recebi’l-ferd li sene seb‘a ve erba‘în ve elf. Şuhûdü’l-hâl: Abdülkādir Çelebi b. Mehmed Efendi, Mustafa Efendi el-Müderris, Siyâmi Efendi b. Tahir, Mehmed b. Abdi, Himmet b. Hüseyin.