Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 213 Hüküm no: 238 Orijinal metin no: [39a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Beşe b. İslâm’ın Dido v. Kika’daki alacağını tecil ettiği Havâss-ı Aliyye kazâsı müzâfâtından Küçükköy demekle ma‘rûfe karye sâkinlerinden Dido v. Kika nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Ahmed Beşe b. İslâm nâm râcil mahzarında bi’t-tav‘i’s-sâf ikrâr ve i‘tirâf edip mezbûr Ahmed Beşe’ye karz-ı şer‘îden altı bin akçe ve beynimizde ma‘lûm bârgir bahâsından dahi üç bin akçe cem‘an dokuz bin akçe deynim olup mezbûr Ahmed Beşe meblağ-ı mezbûrun üç bin akçesini târih-i kitâbdan yetmiş beş gün [39b] tamâmına ve altı bin akçesin bir sene tamâmına değin te’cîl eylemişdir dedikde mukırr-ı mezbûr Dido’nun vech-i meşrûh üzre cârî olan ikrârını merkūm Ahmed Beşe bi’l-muvâcehe tasdîk ve meblağ-ı mezbûr dokuz bin akçeyi minvâl-i meşrûh üzre te’cîl eylediğini bi’l-müşâfehe tahkīk etmeğin mâ vaka‘a gıbbe’t-taleb ketb olundu. Tahrîren fi’l-yevmi’l-hâmis aşer min Recebi’l-ferd târihuhu’l-mezbûr. Şuhûdü’l-hâl: Mustafa b. İdris, Abdullah b. Mustafa, Mustafa b. Mehmed, Mahmud b. Ahmed, Mustafa b. Muharrem.