Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 235 Hüküm no: 273 Orijinal metin no: [44b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Nikola’nın Gora karyesindeki bağını İstati v. Manol’e sattığı Vilâyet-i Rumeli’nde Çatalca kazâsına tâbi‘ Gora nâm karye sâkinlerinden Yani v. Nikola nâm zimmî meclis-i şer‘-i hatîr-i lâzımü’t-tevkīrde yine karye-i mezbûre sâkinlerinden işbu hâmilü’s-sifr İstati v. Manol nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûre sırında vâki‘ bir tarafdan Dimo bağı ve bir tarafdan Manol bağı ve bir tarafdan İstati bağı ve bir tarafdan Papa Dimo bağı ile mahdûd sekiz çapalık mülk bağımı mezbûr İstati’ye fıddî nakd-i râyic fi’l-vakt dört bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve kabûl eylediğinden sonra semen-i mezbûr dört bin akçeyi mezbûr İstati yedinden bi’t-tamâm ve’l-kemâl ahz ve kabz edip mebî‘-i mezbûru mahallinde zabt ve tasarrufa mezbûr İstati’yi taslît eyledim ba‘de’l-yevm zikr olunan bağ-ı mezbûr İstati’nin mülk-i müşterâsı olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sâlis min Ramazâni’l-mübârek li sene seb‘a ve erba‘în ve elf. Şuhûdü’l-hâl: Mahmud b. Ahmed, Mustafa b. Veli, Ali b. Mustafa, Yorgi v. Pragon, Dimo v. İstamo, Pol [v.] Hazoki?, Rizo v. Dimo, Yani v. Praga, Yorgi [v.] Manol.