Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 235 Hüküm no: 272 Orijinal metin no: [44b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vasilike bt. Dimo’nun kefâletten dolayı Ahmed Çelebi Vakfı’na olan borcunu ödemesi Medîne-i Hazret-i Ebî Eyyûb el-Ensârî’de vâki‘ merhûm Ahmed Çelebi vakfı’nın bi’l-fi‘l câbîsi olan Mustafa Halîfe b. Yusuf mahfil-i kazâda mahmiye-i İstanbul’da Edirnekapısı dâhilinde sâkine Vasilike bt. Dimo nâm zimmiye muvâcehesinde üzerine takrîr-i da‘vâ edip mezbûre Vasilike’nin zevci olup bundan akdem hâlik olan Devlo v. Yani zimmetinde vakf-ı mezbûr malından on iki bin akçe ve meblağ-ı mezbûrun bin kırk beş senesinde lâzım gelen murabâhasından dahi dört yüz elli akçe ve kırk altı senesinden bin sekiz yüz akçe cem‘an on dört bin iki yüz elli akçe olup mezbûre Vasilike meblağ-ı mezbûre emr ve kabûlü hâviye kefâlet ile kefîl bi’l-mâl olmuşidi. Suâl olunup, meblağ-ı mezbûrun edâsına tenbîh olunması matlûbumdur dedikde gıbbe’s-suâl mezbûre Vasilike zevci hâlik-i merkūmun zimmetinde mâl-ı vakıfdan vech-i muharrer üzre on dört bin iki yüz elli akçe olduğunu ve kendi dahi meblağ-ı mezbûra emr ve kabûlü hâviye kefâlet ile kefîl bi’l-mâl olduğunu bi’t-tav‘i’s-sâf ikrâr ve i‘tirâf ile cevâb vermeğin, ikrârı mûcebince meblağ-ı mezbûrun edâsına tenbîh olunup mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Halil b. Mehmed, Veli b. Abdünnebi, Eyüb b. Yunus, Ali b. Mustafa, Mahmud b. Ahmed.