Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 236 Hüküm no: 275 Orijinal metin no: [45a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Halil’in, Bayram b. Abdullah ve Yorgi v. Andriye’ye sattığı çiftliğin bedelini iade etmesi Mahmiye-i İstanbul’da ( ) mahallesinde sâkin Mehmed Çelebi b. Halil nâm kimesne mahfil-i kazâda işbu bâ‘iseyi’l-kitâb Bayram b. Abdullah nâm kimesne ile Yorgi v. Andriye nâm zimmî muvâcehelerinde takrîr-i kelâm edip Havâss-ı Refî‘a kazâsına tâbi‘ Bendanicse nâm karyede vâki‘ babam mezbûr Halil’den bi hasebi’l-irsi’ş-şer‘î bana intikāl edip inde’l-ahâlî ve’l-cîrân ma‘lûmü’l-hudûd olan çiftliği cümle tevâbi‘ ve levâhıkı ile bundan akdem mezbûrân Bayram ve Yorgi’ye ale’l-iştirâki’s-seviy yirmi bir bin nakd-i râyic fi’l-vakt fıddî akçeye bey‘ ve teslîm edip onlar dahi vech-i muharrer üzre iştirâ ve tesellüm eyledikden sonra semeni olan meblağ-ı mezbûrun on bin beş yüz akçesini mukaddemâ yedlerinden ahz ve kabz eylemişidim hâlâ mezbûrân Bayram ve Yorgi nâdim olup ikāle murâd eylemekle ben dahi taleben li’l-ecr ve’s-sevâb min meliki’l-vehhâb akd-i mezbûru fesh ve ikāle-i sahîha-i şer‘iyye ile ikāle edip ben meblağ-ı mezbûr on bin beş yüz akçeyi kendilere teslîm onlar dahi kabz ve tesellüm eylediklerinden sonra yine zikr olunan çiftliği cümle tevâbi‘ ve levâhıkı ile bana teslîm eylediler dedikde mukırr-ı mezbûr Mehmed Çelebi’yi cemî‘ ikrâr-ı meşrûhunda merkūmân Bayram ve Yorgi vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Fî gurreti şehri Ramazâni’l-mübârek li sene seb‘a ve erba‘în ve elf. Şuhûdü’l-hâl: Kıdvetü’l-vâ‘izîn eş-Şeyh Nasrullah Efendi, Umdetü’l-müderrisîn Avnullah Efendi, Mustafa Efendi b. Ali el-İmâm, Mustafa Efendi b. Mehmed, Mustafa b. Mehmed, Çolak Hasan Bey, İbrahim Beşe b. İsmail, Abdülkādir Çelebi.