Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 237 Hüküm no: 276 Orijinal metin no: [45a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Halil’in çiftlik ile bağ ve tarlalarını Mustafa Ağa b. Abdullah’a sattığı Mahmiye-i İstanbul’da ( ) mahallesinde sâkin Mehmed Çelebi b. Halil nâm kimesne mahfil-i kazâda işbu râfi‘ü’l-kitâb Mustafa Ağa b. Abdullah mahzarında bi’t-tav‘i’s-sâf ikrâr ve i‘tirâf edip Havâss-ı Aliyye kazâsına tâbi‘ Bendanicse nâm karyede vâki‘ bir tarafı Hristo nâm zimmî mülkü ve bir tarafı mezbûr Mustafa Ağa’ya tefvîz eylediğim tarla ve bir tarafı harman ve bir tarafı tarîk-i âm ile mahdûd olup bir bâb fevkānî odayı ve bir ahırı ve eşcâr-ı müsmire ve gayr-ı müsmireyi hâviye bahçeyi müştemil olan çiftlik ta‘bîr olunur babam mezbûr Halil’den bi hasebi’l-irsi’ş-şer‘î bana intikāl eden menzilimi [ve] mevâzi‘-i müteferrikada vâki‘ inde’l-cîrân ma‘lûmü’l-hudûd olan dört kıt‘a harâbe bağ yeri[ni] mezbûr Mustafa Ağa’ya tarafeynden îcâb ve kabûlü hâvî bey‘-i bâtt-ı sahîh-i ve safka-i vâhide ile on beş bin nakd-i râyic fi’l-vakt fıddî akçeye bey‘ ve teslîm edip onlar dahi vech-i meşrûh üzre iştirâ ve tesellüm eyledikden sonra merhûm Sultan Bayezid-i Velî -tâbe serâhû- evkāfı arâzisinden olup karye-i mezbûre sınırında mevâzi‘-i adîde[de] vâki‘ kadîmden çiftlik-i mezbûr ile tasarruf olunup lede’l-ahâlî ve’l-cîrân her biri ma‘lûmü’l-hudûd olan on bir kıt‘a tarlalarımın dahi hakk-ı tasarrufunu evkāf-ı mezbûre mütevellîsi ma‘rifetiyle yine mezbûr Mustafa Ağa’ya altı bin mezbûrü’n-na‘t akçe mukābelesinde tefvîz edip ol dahi tefevvuz ve kabûl eyleyip bedel-i tefvîz olan meblağ-ı merkūm altı bin akçe ile zikr olunan menzil ve bağ yerlerinin semeni olan on beş bin akçe ki cem‘an yirmi bir bin akçe eder merkūm Mustafa Ağa yedinden bi’t-tamâm ve’l-kemâl ahz ve kabz eyledim ba‘de’l-yevm zikr olunan çiftlik-i mezbûr Mustafa Ağa’nın mülk-i müşterâsı ve mezâri‘-i merkūme dâhil-i taht-ı tasarrufu olmuşdur dedikde gıbbe’t-tasdîki’ş-şer‘î vicâhen mâ vaka‘a bi’t-taleb ketb olundu. Fi’l-yevmi’s-sânî min şehri Ramazâni’l-mübârek li sene seb‘a ve erba‘în ve elf. Şuhûdü’l-hâl: Es-Sâbikūn.