Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 119 Hüküm no: 136 Orijinal metin no: [31b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahr-ı siyah canibine yapılacak seferde kullanılacak ince donanma-i hümayunun ihtiyacı olan gemilerin inşasında kullanılacak kerestelerin nakli Kıdvetü’n-nüvvâbi’l-müteşerri‘în Kartal kazâsında nâibü’ş-şer‘ olan mevlânâ -zîde ilmühû- ve mefâhirü’l-emâsil ve’l-akrân voyvoda ve sâir a‘yân ve zâbitân ve tersâne-i âmirem tarafından bu husûsâ mübâşir ta‘yîn olunan -zîde kadruhüm- tevkī‘-i refî‘-i hümâyûn vâsıl olıcak ma‘lûm ola ki evvel-bahârda Bahr-ı siyâh cânibine ihrâcı muktezî ince donanma-i hümâyûnum sefâininden tersâne-i âmirem sahasında müceddeden binâ ve inşâ ve techîzleri fermânım olan şahtur ve celbelerin lâzıme-i inşâ içün Gekbûze kazâsından kat‘ ve nakli tertîb olunan elli bin yedi yüz kırk aded ecnâs-ı kerestenin kat‘ ve nakline mübâşeret olundukda öteden beri kazâ-i mezbûr ahâlîleri vârid ve teklîf-i sâirleri edâda tekâsül ve tesâmuhları olmayup ancak kazâ-i mezbûr memerr mahâlde vâki‘ olmağla matlûb olan ecnâs-ı kerestenin nakli kati? vâfir arabaya muhtaç ve ahâlî-i kazâya za‘af târî ve arabaları kalîl olup şiddet-i şitâ tekarrüb eylemekden nâşî nakl-i kereste te’hîre dahi kalmamak içün civârlarında vâki‘ Kartal kazâsının arabaları kesîr ve naklolunacak kereste Kartal’a yakın olup ahâlîleri ale’d-devâm kereste nakli ile me’lûf olduklarını bundan mukaddemce Gekbûze nâibi i‘lâm ve sâbıkā tersâne-i âmirem emîni Resmi Ahmed Efendi -dâme mecdühû- takrîriyle i‘lâm ve bu makūle umûr-ı müsta‘cele-i mühimmî-i mîriyeden mu‘âf ve gayr-ı mu‘âf ve havâss ve evkāf ve yeniçeri ve sâirleri bi’l-cümle dâhiller olmalarıyla îcâb eden ücret-i nakliyeleri emîn-i mûmâ-ileyh tarafından verilmek üzere Kartal kazâsından mikdâr-ı kifâye arabalar tedârük ve mîrî keresteyi tahmîl ve iskeleye nakletdirilmek üzere bundan mukaddemce emr-i âlîşânım ısdâr ve emîn-i sâbık mûmâ-ileyh tarafından ol cânibe irsâl olunmuşidi el-hâletü hâzihi donanma-i hümâyûnumun vakt-i hareketi tekarrüb edüp iktizâ eden sefâinin bir gün akdem inşâ ve tekmîli maslahatı zımnında tersâne-i âmirem emâneti Devlet-i aliyyemde sâbıkā şıkk-ı evvel <> defterdârı olan İbrahim Sarim -zîde uluvvuhû-nun uhde-i ihtimâmına tefvîz ve ihâle olunmağla zikr olunan keresteden dahi her ne mikdâr bâkī kalmış ise müsta‘celen [ve] mu‘accelen Kartal kazâsından dahi kifâyet mikdârı arabalar tedârük ve ta‘yîn birle iskelelere nakillerine ihtimâm olunmak üzere te’kîden ve isti‘câlen işbu emr-i âlîşânım ısdâr ve ( ) ile irsâl olunmuşdur buyurdum ki imdi siz ki nâib ve voyvoda-i mûmâ-ileyhimâ ve sâirlerisiz zikr olunan ecnâs-ı keresteden her ne mikdâr kalmış ise bir sâ‘at mukaddem arabalar ile iskeleye nakli sizlerden matlûb-ı hümâyûnum olmağla ma‘âzallâhu te‘âlâ bundan böyle dahi bu husûsda ser-i mû kusûr ve fütûrlarınız ihsâs olunur ise mazhar-ı inâyet ve ikāb olunacağınız ma‘lûmlarınız olup ona göre [32a] muktezâ-yı hareket <> ve mîrî fiât üzere îcâb eden ücret-i nakliyeleri emîn-i lâhık mûmâ-ileyh tarafından an-nakdin ashâbına verilmek şartıyla Kartal kazâsından mikdâr-ı kifâyet arabalar tedârük ve mîrî kerestenin bir kıt‘ası geriye kalmamak üzere mecmû‘unun ma‘rifetleriniz ve mübâşir-i merkūm mübâşeretiyle arabalara tahmîl ve iskeleye nakl ve tesyîre müsâra‘at ve eğer zikr olunan keresteyi kazânız ahâlîleri ve arabacı tâifesi naklinden özür ve illet ile ince donanma-i hümâyûnumun te’hîrine sebeb ve illet olmaları lâzım gelir ise te’dîb ve gûş-mâl olunacakları tefehhüm ve her ne tarîk ile olunur ise olsun mikdâr-ı kifâye arabalar tedârük ve kereste tahmîl ve iskeleye nakline ale’l-ittifâk ihtimâm ve dikkat ve hilâfından hazer ve mücânebet eyleyesiz ve sen ki mübâşir-i merkūmsun fermânım olduğu vechile kusûr kalan kereste içün Kartal kazâsı ahâlîlerine mikdâr-ı kifâye arabalar tedârük etdirdüp ve mîrî keresteyi bilâ-tavakkuf tahmîl ve iskeleye nakl ve tesyîr ve edâ-i hizmetde ta‘allül ve muhâlefet edenleri olur ise muhkem haklarından gelinmek içün ismi ve resimleriyle tahrîr ve inhâya müsâra‘at ve matlûb olan ecnâs-ı keresteyi arabalar ile iskeleye nakletdirmeye sa‘y ü ikdâm ve hilâfından ihtirâz-ı tâm eylemeniz bâbında fermân-ı âlîşânım sâdır olmuşdur buyurdum ki hükm-i şerîfim vardıkda bu bâbda vech-i meşrûh üzere şeref-yâfte-i sudûr olan işbu emr-i şerîf-i celîlü’ş-şân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnu ile âmil olup hilâfından be-gāyet ihtirâz ve ictinâb eyleyesiz şöyle bilesiz alâmet-i şerîfe i‘timâd kılasız ve’s-selâm. Tahrîren fi’l-yevmi’l-hâdi ışrîn Şa‘bâni’l-mu‘azzam li-sene isnâ ve semânîn ve mi’ete ve elf.