Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 121 Hüküm no: 137 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Komşularını rahatsız eden Kayaoğlu Kostandi’nin kürek cezasına çarptırılmak üzere yakalanıp Dersaadet’e gönderilmesi Mesfûr bulunduğu mahâlde ahz ve te’dîben tersâne-i âmirede çekdirme sefînelerinden birine vaz‘ olunmak üzere Dersa‘âdet’e ihzâr olunmak içün hükm. Ma‘rûz-ı dâ‘î-i Devlet-i aliyyeleridir ki Medîne-i Üsküdar’a muzâfe Adalar nâhiyesine tâbi‘ Ada-i kebîr karyesi ahâlîlerinden ve kocabaşılarından Aci Dimitraki ve Aci Tanaş ve Dülger Yanaki ve Yamandi ve Anasti Anaştaş ve Ligori ve Kostandi ve Kofolmoz? ve Kazgancıoğlu Kostandi ve Manolaki ve Şişman Andon zimmîler ile sâirleri meclis-i şer‘a ihzâr olunan Kayaoğlu Kostandi v. Yorgaki zimmî muvâcehesinde her biri takrîr-i kelâm edüp ve ifâde-i merâm ederler ki merkūm Kayaoğlu Kostandi zimmî kendü hâlinde olmayup hîlede mâhir ve tezvîrde zâhir her birimize gûnâ-gûn zarârı isâbet edüp sekerân olduğu hâlde bize deyyus diyerek ana ve avradımıza şetm ile hetk-i ırz edüp hâlâ bâ-hüccet-i şer‘iye kocabaşılarımızın umûruna ve vâki‘ olan salyânemizin tahsîlinde nizâmımıza halel verüp ta‘til dâ’imâ fıska mâ’il zimmîdir kendüden bir türlü emn ü rahatımız yokdur ve hoşnûd değiliz deyü sû-i hâlini haber verüp bundan böyle umûrumuza bir türlü karışmamak üzere ıslâh-ı nefs oluncaya değin sefîne-i sultâniyeye vaz‘ olunmak bâbında fermân-ı âlî sudûrunu ricâ ve niyâz ederiz deyip hâllerimize merhameten hakīkat-i hâli Der-i adle i‘lâm ediver deyü cümlesi ilhâh ve ibrâm etmeleriyle ol ki vâkı’u’l-hâldir bi’l-iltimâs huzûr-ı âlîlerine i‘lâm olundu bâkī emr men-lehü’l-emrindir. Fî 7 Şa‘bân sene [1]182 El-abdü’d-dâ‘î li’d-Devleti’l-aliyyeti’l-Osmaniye Hüseyin el-müvellâ-hilâfeten bi-nâhiyeti Adalar. Temme’l-kelâm fî-hâze’l-makām nemekahü’l-fakīr ileyhi azze-şânühu Hüseyin el-müvellâ hilâfeten bi-nâhiyeti Adalar el-Kādı bi-kazâ-i Serfice muvakkaten -ufiye anhü-. [Mühür] Hakka tefvîz eyledi Hüseyin umûrunu. Manol Çorbacı yedine mürâsele-i şer‘ verilüp Adalar’da vâkı‘a olan umûr-ı şer‘iyeyi taraf-ı şer‘a irsâle ta‘yîn olunduğu kayd şüd. Selh-i Zilka‘de sene 1182