Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 220 Hüküm no: 212 Orijinal metin no: [28a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Petro v. Nikola’nın Yani v. Zaho’daki alacağını tecil ettiği Papuçcu tâifesinden Petro v. Nikola nâm zimmî meclis-i şer‘-i hatîr-i lâzımü’t-tevkīrde Yani v. Zaho nâm zimmî muvâcehesinde ikrâr ve takrîr-i kelâm edip mezbûr Yani’ye târih-i kitâbdan iki sene mukaddem papuç dikmek için yevmî yirmişer akçe ücret ile nefsimi îcâr edip ol dahi istîcâr ettikden sonra ba‘de külli hesâb dokuz buçuk ayda merkūm Yani zimmetinde müctemi‘ olan bin dokuz yüz akçe ücretimi mukaddemâ merkūm Yani’den da‘vâ ve taleb ettiğimde ol dahi inkâr etmekle beynimizde münâza‘ât-ı kesîre vakı‘a olmuşidi el-hâletü hâzihî muslihûn tavassut edip mezbûr Yani ile beynimizde bin akçe üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr bin akçeyi târih-i kitâbdan otuz gün tamâmına değin bana edâya te’cîl edip husûs-ı mezbûra müte‘allika da‘vâdan merkūm Yani’nin zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis min Cumâdelâhire li sene seb‘a ve seb‘în ve elf. Şuhûdü’l-hâl: Şükrullah Bey b. Mustafa, Abdi Çelebi b. Hüseyin, Resul b. Rıdvan, Veli b. Mahmud.