Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 220 Hüküm no: 211 Orijinal metin no: [27b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Bey b. Abdullah’ın ev eşyalarını karısı Rahime Hatun’a hibe ettiği Mahmiye-i İstanbul’da Akseki mahallesi sâkinlerinden Hüseyin Bey b. Abdullah nâm kimesne tarafından husûs-ı âti’l-beyâna vekîl olduğu Veli Beşe b. Şükrullah ve Mehmed Çelebi b. Rıdvan ve Abdi Çelebi b. Hüseyin nâm kimesneler şehâdetleriyle şer‘an sâbit olan [28a] İbrahim Çelebi b. Mehmed nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de müvekkil-i mezbûrun zevce-i menkûhası Rahime Hâtun bt. Abdullah tarafından husûs-ı câ’i’l-beyâna vekîl olduğu zâtını ma‘rifet-i şer‘iyye ile ârifûn olan şâhidûn-ı mezbûrûn şehâdetleriyle şer‘an sâbit olan mahalle-i mezbûre müezzini fahrü’l-akrân Mehmed Çelebi b. Ali nâm kimesne mahzarında ikrâr ve takrîr-i kelâm edip müvekkil-i mezbûr Hüseyin Bey emlâkinden bir döşek ve iki minder ve bir beyaz velense ve dört yastık kılıfı ve üç köhne yorgan ve bir sünbülü altmış merre kaftan ve bir yeşil muvahhidi ve bir beyaz terlik ve bir siyah kapama ve iki bakır tencere ve iki bakır sahan ve bir bakır kahve ibriği ile nakid otuz beş aded şerîfî altınını zevce-i menkûhası müvekkile-i merkūme Rahime hâtuna hibe-i sahîha-i şer‘iyye ile hibe ve teslîm edip ol dahi meclis-i hibede ittihâb ve kabûl ve kabz ve tesellüm eyledi ve müvekkil-i mezbûr Hüseyin Bey’in zevcesi müvekkile-i merkūme Rahime Hâtun ile mahalle-i mezbûrede müezzine meşrût sâkin o[l]dukları menzil içinde eşyâ-i mezbûreden gayrı her ne var ise zevcem müvekkile-i mezbûre Rahime Hâtunu’ndur dedi dedikde gıbbe’t-tasdîki’l-vicâhî ve’t-tahkīki’ş-şifâhî mâ hüve’l-vâki‘ bi’t-taleb ketb olundu. Fi’l-yevmi’s-sânî min Cemâziyelâhir li sene seb‘a ve seb‘în ve elf. Şuhûdü’l-hâl: Yusuf Efendi b. ( ), Mustafa Ağa b. Mehmed, Veli Beşe b. Abdüşşekûr, Ahmed Çelebi b. Sefer el-Müezzin, Mehmed Efendi.