Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 242 Hüküm no: 285 Orijinal metin no: [46a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiro v. Dido’nun Ergirikasrı kazasında bulunan menzilini Kiro v. Mankoli’ye sattığı Vilâyet-i Rumeli’nde Ergirikasrı kazâsına tâbi‘ Sanagoplu nâm karye sâkinlerinden Kiro v. Dido nâm zimmî meclis-i şer‘-i hatîr-i lâzımü’t-tevkīrde yine karye-i mezbûre sâkinlerinden işbu hâmilü’s-sifr diğer Kiro v. Mankoli nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûrede vâki‘ bir tarafdan Dimo v. Niko mülkü ve bir tarafdan Kiro v. Lazo mülkü ve iki tarafdan tarîk-i âm ile mahdûd bir bâb fevkānî beyti ve altında ahırı ve bir bâb tahtânî beyti ve zât-ı eşcâr-ı müsmire ve gayr-ı müsmire hadîkayı müştemil mülk menzilimi ve yine karye-i mezbûrede vâki‘ bir tarafdan Kiro v. Solak mülkü ve bir tarafdan Nikola mülkü ve iki tarafdan tarîk-i âm ile mahdûd tahmînen buçuk dönüm bir kıt‘a mülk bostanımı mezbûr Kiro’ya fıddî nakd-i râyic fi’l-vakt altı bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile [46b] bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr altı bin akçeyi mezbûr Kiro yedinden bi’t-tamâm ve’l-kemâl ahz ve kabz edip zikr olunan menzil ve bostanı mahallinde zabt ve tasarrufa mezbûr Kiro’yu taslît eyledim ba‘de’l-yevm zikr olunan menzil ve bostan mezbûr Kiro’nun mülk-i müşterâsı olmuşdur. Keyfe mâ yeşâ’ ve yahtâr mutasarrıf olsun dedikde mukırr-ı mezbûr Kiro’yu ikrâr-ı meşrûhunda el-mukarru lehü’l-mezbûr diğer Kiro vicâhen tasdîk ve şifâhen tahkīk edicek mâ vaka‘a gıbbe’t-taleb ketb olundu. Tahrîren fi’l-yevmi’s-sâdis min şehri Ramazâni’l-mübârek li sene seb‘a ve erba‘în ve elf. Şuhûdü’l-hâl: Ali b. Mustafa, Mahmud b. Ahmed, Ali b. Abdullah, Yakub b. Kurd, Kiro Papas, Kiko v. Dido, Dido [v.] Mankoli, Mankoli [v.] Kiro, Mankoli [v.] Lika, Borma [v.] Darak, Kika [v.] Tanaşi, Yako [v.] Kiro ve gayru[hüm].