Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 242 Hüküm no: 284 Orijinal metin no: [46a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kalender b. Macar’ın menzilini eşi Nana bt. Mustafa’ya sattığı Medîne-i Hazret-i Ebî Eyyûb el-Ensârî mahallâtından Zühre Hâtun mahallesi sâkinlerinden Kalender b. Macar nâm Kıbtî meclis-i şer‘-i hatîr-i lâzımü’t-tevkīrde zevcesi işbu hâmiletü’l-kitâb Nana bt. Mustafa nâm hâtun mahzarında bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafdan Hüseyin b. Hasan mülkü ve bir tarafdan Mehmed b. Bâli mülkü ve iki tarafdan tarîk-i âm ile mahdûd bir bâb tahtânî beyti ve önünde haded-i kârhânesini müştemil mülk menzi[limi] cümle tevâbi‘ ve levâhıkı ile zevcem mezbûre Nana’ya fıddî nakd-i râyic fi’l-vakt iki bin beş yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr iki bin beş yüz akçeyi zevce-i mezbûre Nana’ya zimmetimde edâsı lâzım olan iki bin beş yüz akçe deynime takās eyledim ba‘de’l-yevm sâlifü’z-zikr menzil zevcem mezbûre Nana’nın mülk-i müşterâsı olmuşdur. Keyfe mâ teşâ’ ve tahtâr mutasarrıfe olsun dedikde mukırr-ı mezbûr Kalender’in minvâl-i meşrûh üzre cârî olan ikrârını el-mukarru lehâ’l-mezbûre Nana vicâhen tasdîk ve şifâhen tahkīk edicek mâ vaka‘a gıbbe’t-taleb ketb olundu. Tahrîren fi’l-yevmi’l-hâmis min şehri Ramazâni’l-mübârek li sene seb‘a ve erba‘în ve elf. Şuhûdü’l-hâl: Hüseyin b. Hasan, Hasan b. Mustafa, Hızır b. Solak, Kara Mehmed b. Hamza, Mahmud b. Ahmed, Yakub b. Kurd, Mustafa b. Veli.