Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 246 Hüküm no: 289 Orijinal metin no: [46b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime Hatun’un vefatından önce bostanının yarısını oğulları Halil Çelebi ve Mehmed Halîfe’ye satmış olduğu Medîne-i Hazret-i Ebî Eyyûb el-Ensârî mahallâtından Ali Paşa-yı Cedîd mahallesi sâkinlerinden işbu hâmilü’l-kitâb Halil Çelebi ve Mehmed Halîfe ibney Murtaza nâm karındaşlar mahfil-i kazâda her biri takrîr-i kelâm edip mahalle-i mezbûre sâkinlerinden iken müteveffât olan ceddemiz merhûme Rahime Hâtun hâl-i hayâtında ve kemâl-i sıhhatinde hazret-i müşârün-ileyhânın evkāfından olup medîne-i mezbûrede merhûm Dökmecizâde Efendi [47a] mahallesinde vâki‘ bir tarafdan merhûm Kara Süleyman Efendi’nin vakıf bostanı ve bir tarafı merhûm Ali Paşa-yı Cedîd bostanları ve bir tarafı Hekimzâde mülkü ve bir tarafı tarîk-i âm ile mahdûd olan bostandan icâre-i mu‘accele ve beher sene dört yüz akçe icâre-i müeccele ile mutasarrıfe olduğu nısf hisse-i mu‘ayyenesinin hakk-ı tasarrufunu, işbu târih-i kitâb senesi Şa‘bânü’l-mu‘azzamı’nın yirmi ikinci gününde evkāf-ı mezbûre mütevellîsi olan Kemânî Mustafa ma‘rifetiyle ale’l-iştirâki’s-seviy bizim ikimize ferâgat eyledikde merhûm Mustafa Ağa dahi yedimizden cânib-i vakfa beş bin nakd-i râyic fi’l-vakt fıddî akçe ahz ve kabz edip ceddemiz mezbûre Rahime Hâtun’un mutasarrıfe olduğu temessükünde vech-i meşrûh üzre derkenâr eylemişidi nazar olunup li ecli’l-istihkâm cânib-i şer‘de dahi mûcebince hüccet-i şer‘iyye olunması matlûbumuzdur deyû târih-i mezbûr ile müverrah merkūm Mustafa Ağa’nın imzâ ve hatmini müştemil derkenâr-ı temessük ibrâz eylediğimde ba‘de’n-nazar tahrîri takrîrleriyle mutâbık bulunmağın mâ vaka‘a gıbbe’t-taleb ketb ve imlâ ve yedlerine def‘ ve i‘tâ olunduğun lede’l-hâce kâşif-i mâ mezâ ve müzekkir-i mâ cerâ ola. Tahrîren fi’l-yevmi’l-hâmis min şehri Ramazâni’l-mübârek li sene seb‘a ve erba‘în ve elf. Şuhûdü’l-hâl: Mehmed Efendi ( ) el-İmâm, Mehmed Halîfe b. Hasan el-Müezzin, Mustafa Halîfe b. ( ), Veli Halîfe b. Abdullah, Hasan Çelebi el-Cündî, İsmail Çelebi b. Ahmed Ağa, Osman Bey b. Abdullah, Yakub b. Kurd, Mahmud b. Ahmed, Muharrirü’l-hurûf Abdülkādir el-Eyyûbî.