Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 246 Hüküm no: 290 Orijinal metin no: [47a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Ali’nin sahipsiz bulduğu öküzleri Gümrük Emini Ali Ağa’ya teslim ettiği Hâssa su sığırı mandıracılarından Mehmed Beşe b. Abdullah mahfil-i kazâda Havâss-ı Refî‘a kazâsı müzâfâtından Birinci nâm karye sâkinlerinden Hasan b. Ali mahzarında takrîr-i kelâm edip târih-i kitâbdan bir buçuk ay mukaddem Küçükköy demekle ma‘rûfe olan karyede bin altı yüz akçeye iştirâ eylediğim bir re’s gök ve bir re’s yanağında sağ cânibinde ur nişânı olan sarı iki re’s kara sığır öküzleri, Terkos nâhiyesine tâbi‘ Ağaçlı nâm karye kurbunda mütemekkin mandıra etrâfında mer‘âda gezer iken merkūm Hasan yava olmak zu‘mu ile ahz edip kendi karyesine getirmişdir. Suâl olunması matlûbumdur dedikde gıbbe’s-suâl mezbûr Hasan cevâbında, fi’l-hakīka evsâf-ı mezbûre ile mevsûfe olan iki re’s kara sığır öküzlerini sâkin olduğum Birinci köyü semtinde bulup târih-i kitâbdan bir ay mukaddem yava olmak zu‘muyla ahz edip bi’l-fi‘l Gümrük emîni olan Ali Ağa’ya teslîm eyledim mezbûr Mehmed Beşe’nin mülkü olduğu ma‘lûmum değildir deyicek vâki‘ hâl hıfzan li’l-makāl gıbbe’t-taleb ketb olundu. Fi’l-yevmi’s-sâdis min Ramazâni’l-mübârek li sene seb‘a ve erba‘în ve elf. Şuhûdü’l-hâl: Yusuf Çelebi b. ( ), İbrahim Beşe b. Mustafa, Mehmed b. Ali, Cafer b. Abdullah ve gayruhüm.