Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 224 Hüküm no: 218 Orijinal metin no: [28b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hatun bt. el-Hâc Mehmed Ağa’nın câriyesi Zamâne’yi âzat ettiği ve ölümünden sonra ev eşyalarının ona verilmesini vasiyet ettiği Mahmiye-i İstanbul’da Hoca Resmî mahallesi sâkinelerinden umdetü’l-muhadderât Fâtıma Hâtun bt. el-Hâc Mehmed Ağa tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Ahmed Çelebi b. Ebûbekir ve Resul Efendi b. Mustafa nâm kimesneler şehâdetleri ile şer‘an sâbit olan umdetü’l-a‘yân Mehmed Ağa b. Abdüddeyyân meclis-i şer‘-i şerîf-i Ahmedî ve mahfil-i dîn-i münîf-i Muhammedî’de bi’l-vekâle ikrâr ve takrîr-i kelâm edip müvekkilem mûmâ-ileyhâ Fâtıma Hâtun bin yetmiş dört senesi Cumâdelûlâsı’nda kendiye rıkkıyyetini mu‘terife olan uzun boylu, açık kaşlı, kara gözlü Moskoviyyetü’l-asl Zamâne bt. Abdullah nâm câriye-i memlûkesini hasbeten lillâhi’l-Hallâk malından tahrîr ve i‘tâk ve zümre-i harâir-i asliyyâta idrâc ve ilhâk edip mevsûfe-i mezbûre târih-i mezbûrdan beri hürre olup üzerinde velâ-i şer‘îden gayrı müvekkilemin hakkı kalmamışidi hâlâ müvekkilem mûmâ-ileyhâ Fâtıma Hâtun bi emrillâhi te‘âlâ dâr-ı fenâdan dâr-ı bekāya intikāl ve irtihâl ettiğimde malımdan mezbûre Zamâne’ye iki yorgan ve iki döşek ve iki minder ve iki yastık ve iki sahan ve iki tencere ve bir tepsi ve bir ibrik ve bir leğen ve yüz esedî guruş ve esvâbından iki ferâce ve iki kaftan ve bir zıbın ve bir entari ve iki gömlek ve iki don verile deyû vasiyyet edip tenfîzine hâzır bi’l-meclis fahrü’l-akrân Musli Ağa b. Ahmed’i vasiyy-i muhtâr nasb ve ihtiyâr edip ol dahi vesâyet-i merkūmeyi kabûl ve merâsimini edâya ta‘ahhüd eyledi dedikde mûmâ-ileyh Musli Ağa dahi tasdîk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sânî min Cumâdelâhire li sene seb‘a ve seb‘în ve elf. Şuhûdü’l-hâl: Mahmud Ağa b. Receb, Mustafa Efendi b. Müstakīm, Süleyman Efendi b. ( ), Mustafa Çelebi b. Mehmed, Ahmed Çelebi Kâtib, Mehmed Efendi, Abdi Çavuş, Mustafa Efendi, Mehmed Bey b. İlyas, Mehmed Çavuş b. Abdullah, Mehmed Çelebi b. Abdullah.