Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 223 Hüküm no: 217 Orijinal metin no: [28b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Ağa b. İsmail Ağa’nın evini Osman Ağa b. Musli’ye sattığı Dârü’l-hilâfeti’l-aliyye Kostantıniyye el-mahmiyye mahallâtından Sarı Nasuh mahallesi ahâlîsinden umdetü’l-emâsil ve’l-ekfâ Mustafa Ağa b. İsmail Ağa nâm kimesne tarafından husûs-ı âti’l-beyâna vekîl olduğu Ömer Efendi b. İsmail ve Mehmed Çelebi b. Abdurrahman nâm kimesneler şehâdetleriyle şer‘an sâbit olan çukadâr Mehmed Çelebi b. İsa nâm kimesne meclis-i şer‘-i şerîf-i Nebevî ve mahfil-i dîn-i münîf-i Mustafavî’de dergâh-ı âlî -dâme mahfûfen bi’l-me‘âlî- yeniçerilerinin onuncu ağa bölüğü yoldaşlarına mahsûs odanın çavuşu olan mefhar-i akrân Osman Ağa b. Musli nâm kimesne tarafından husûs-ı câ’i’l-beyâna vekîl olduğu şâhidân-ı mezbûrân şehâdetleriyle şer‘an sâbit olan korucu Hasan Beşe b. Abdullah nâm kimesne mahzarında ikrâr ve takrîr-i kelâm edip bey‘-i âti’z-zikrin sudûruna değin müvekkilim mûmâ-ileyh Mustafa Ağa’nın yedinde mülkü ve hakkı olup mahmiye-i mezbûrede Hüsrev Paşa türbesi kurbunda Kazasker Mehmed Efendi mahallesinde vâki‘ bir tarafdan bakkal Hasan mülkü ve bir tarafdan merhûm Haydar Ağazâde kızının kızı Fâtıma Hâtun bt. Ali Ağa mülkü ve bir tarafdan Medîne-i Münevvere vakfı’ndan Bakkal Ali Beşe nâm kimesne tasarrufunda olan menzil ile zikr olunan Kazasker Mehmed Efendi müezzinine meşrût vakf menzili ve bir tarafdan tarîk-i âm ile mahdûd dâhiliyyesinde fevkānî bir oda ve bir sofa ve bir tahta-pûş ve tahtânî bir oda ve bir matbah ve mezbûr Bakkal Ali Beşe ile müşterek bir su kuyusu ve bir kenîf ve hâriciyyesinde fevkānî bir oda ve tahtânî bir oda ve bir ahır ve bir kenîfi müştemil menzili cemî‘ tevâbi‘i ve levâhıkı ve âmme-i hukūk ve merâfıkı ile tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile beş yüz kıt‘a esedî guruşa müvekkil-i mezbûr Osman Ağa’ya bey‘ ve teslîm edip ol dahi iştirâ ve kabûl ve tesellüm eyledikden sonra semeni olan meblağ-ı mezbûr beş yüz kıt‘a esedî guruşu tamâmen yedinden alıp kabz eyledi ba‘de’l-yevm menzil-i mahdûd-ı mezbûr müvekkil-i merkūm Osman Ağa’nın mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî selh-i Cumâdelâhire sene 1077. Şuhûdü’l-hâl: Osman Beşe b. Receb, Mahmud Efendi b. Rüstem, Mehmed Çelebi b. Ali, kazzâz Hasan Çelebi.