Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 297 Hüküm no: 368 Orijinal metin no: [59a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Bâli’nin mehir davasının reddi Medîne-i hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Takyecibaşı mahallesinde sâkine Âişe bt. Bâli nâm Hâtun mahfil-i kazâda işbu bâ‘isü’l-kitâb Mustafa b. Ahmed muvâcehesinde üzerine takrîr-i da‘vâ edip ben mezbûr Mustafa’nın mukaddemâ menkûhası olup tatlîk eyledikde iki bin beş yüz akçe mehr-i müeccelim zimmetinde kalmışidi suâl olunup meblağ-ı mezbûrun teslîmine tenbîh olunması matlûbumdur dedikde gıbbe’s-suâl mezbûr Mustafa cevâbında, fi’l-vâki‘ müdde‘iye-i mezbûrenin zimmetinde iki bin beş yüz akçe mehr-i müecceli olup lâkin tatlîk eylediğimde mehrinden sekiz yüz nakd-i râyic fi’l-vakt fıddî akçeye kendiye teslîm edip meblağ-ı bâkī bin yedi yüz akçeye müte‘allik da‘vâdan zimmetimi ibrâ-i âmm-ı kātı‘ü’n-nizâ‘ ile ibrâ ve iskāt eyleyip minvâl-i muharrer üzre hüccet-i şer‘iyye olunmuşidi deyip mazmûnu takrîrine mutâbık hüccet ibrâz edicek gıbbe’l-istintâk mezbûre Âişe mazmûn-ı hüccet-i merkūmeyi inkâr etmeğin mezbûr Mustafa’dan yedinde olan hüccet-i şer‘iyyenin mazmûnuna mutâbık beyyine taleb olundukda, udûl-i ricâlden Abdurrahman Halîfe b. Musa ve Mustafa Çelebi b. Ömer nâm kimesneler meclis-i şerî‘at-nihâda li ecli’ş-şehâde hâzırân olup istişhâd olunduklarında, fi’l-vâki‘ mezbûr Mustafa merkūme Âişe’yi tatlîk eyledikde bizim huzûrumuzda sekiz yüz akçe kendiye def‘ ve teslîm edip ol dahi kabz ve tesellüm eyledikden sonra meblağ-ı bâkī bin yedi yüz akçeye müte‘allik da‘vâdan zimmetini ibrâ ve iskāt eyleyip minvâl-i muharrer üzre hüccet-i şer‘iyye olunmuşidi. Biz bu husûsa şâhidleriz şehâdet dahi ederiz deyû mezbûr Mustafa’nın yedinde olan hüccet-i şer‘iyyesinin mazmûnuna mutâbık edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın, mezbûre Âişe bî-vech mu‘ârazadan men‘ olunup mâ hüve’l-vâki‘ gıbbe’t-taleb ketb olundu. Fi’l-yevmi’l-âşir min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Mahmud b. Ahmed, Mustafa b. Ahmed, Ali b. Mustafa, Ali b. Abdullah, Mustafa b. Veli.