Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 297 Hüküm no: 369 Orijinal metin no: [59a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Bey b. Mehmed’in Yorgi v. İstefani’ye borcunun kalan kısmının tecil edilmesi Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Kızıl Mescid mahallesi sâkinlerinden Ali Bey b. Mehmed el-Cündî meclis-i şer‘-i hatîr-i lâzımü’t-tevkīrde işbu hâmilü’s-sifr Yorgi v. İstefani nâm zimmî muvâcehesinde bi tav‘ihî ikrâr-ı tâm ve takrîr-i kelâm edip mezbûr Yorgi’den otuz bin akçeye bir samur kürk iştirâ ve kabz edip altı bin akçesin mezbûr Yorgi’ye def‘ ve teslîm edip yirmi dört bin akçesi hâlâ zimmetimde mezbûr Yorgi’ye vâcibü’l-edâ ve lâzımü’l-kazâ deynim olup târih-i kitâbdan yirmi gün tamâmına değin te’cîl eylemişdir [59b] dedikde mezbûr Ali Bey’in minvâl-i meşrûh üzre cârî olan ikrârını mezkûr Yorgi bi’l-muvâcehe tasdîk ve meblağ-ı mezbûr otuz bin akçenin altı bin akçesin kabz edip yirmi dört bin akçesin yirmi gün tamâmına te’cîl eylediğini bi’l-müşâfehe tasdîk etmeğin mâ vaka‘a gıbbe’t-taleb ketb olundu. Tahrîren fi’l-yevmi’r-râbi‘ aşer min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Mustafa Çavuş b. Abdi, el-Hâc Kurd b. Hasan, Mustafa b. Mehmed, İbrahim Çelebi b. Mustafa, Mustafa b. Abdi, İsmail Bey b. Abdullah, Çâker Efendi el-Kâtib, Mustafa Çavuş b. ( ) eş-şehîr bi Karabatak.