Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 304 Hüküm no: 377 Orijinal metin no: [61a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Panayot v. Yani’nin menzil ile bağını Dilaver b. Abdullah’a sattığı Vilâyet-i Rumeli’nde cezîre-i Mora’da Mizistre kazâsına tâbi‘ Lefki nâm karye sâkinlerinden Panayot v. Yani nâm zimmî meclis-i şer‘-i hatîr-i lâzımü’t-tevkīrde işbu bâ‘isü’l-kitâb Dimitri v. Pavlo nâm zimmî tarafından menzil-i âti’z-zikr ile kürûmu câ’i’l-beyânı şirâya ve def‘-i semene vekîl olup hasm-ı câhid mahzarında nehc-i şer‘î üzre vekâleti sâbite olan li ebeveyn karındaşı Dilâver b. Abdullah mahzarında bi’t-tav‘i’s-sâf ikrâr ve i‘tirâf edip karye-i mezbûrede vâki‘ bir tarafdan Yorgo mülkü ve bir tarafdan Hristo mülkü ve bir tarafdan İbrahim nâm kimesne mülkü ve bir tarafdan tarîk-i âm ile mahdûd iki bâb beyti ve muhavvatayı müştemil mülk menzilimi ve yine karye-i mezbûre sınırında vâki‘ bir tarafdan Hüseyin b. Abdullah bağı ve bir tarafdan Talbura bağı ve bir tarafdan Mesih nâm kimesne bağı ve bir tarafdan tarîk-i âm ile mahdûd (…) bir kıt‘a mülk bağımı mezbûr Dilâver[’e] fıddî nakd-i râyic fi’l-vakt altı yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile bey‘ edip ol dahi müvekkil-i mezbûr Dimitri için iştirâ ve kabûl eyledikden sonra semen-i mezbûr altı yüz akçeyi tamâmen mezbûr Dilâver yedinden ahz ve kabz edip mebî‘-i mezbûru tahliyye, zabt ve tasarrufa mezbûr Dilâver’i taslît eyledim ba‘de’l-yevm sâlifü’z-zikr menzil ve bağ-ı mezbûr Dimitri’nin mülk-i müşterâsı olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’s-sâdis aşer min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Derviş Çelebi b. Ferruh, Abdülkerim b. Mehmed, Mehmed b. Ahmed, Mustafa b. Veli, Yorgo v. Yoros, Yani v. Nikola ve g[ayruhum].