Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 303 Hüküm no: 376 Orijinal metin no: [61a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todori v. Rizo borçlarının terekesinden ödenmesi Vilâyet-i Rumeli’nde Yenişehir kasabası müzâfâtından Fener nâhiyesine tâbi‘ Petrok? nâm karye zimmîlerinden Yorgi v. İskarlet ve Dimo v. Anderon ve İstati v. Şimo ve Poliz v. Yani ve Paroş v. Rizo nâm zimmîler ve sâirleri mahfil-i kazâda karye-i mezbûreden olup bundan akdem hâlik olan Todori v. Rizo nâm zimmînin li ebeveyn karındaşı olup muhallefâtına vâzı‘ü’l-yed olan Paroş nâm zimmî muvâcehesinde her biri üzerine takrîr-i da‘vâ edip hâlik-i merkūmu târih-i kitâbdan iki yıl mukaddem ahâlî-i karyeden olup mahmiye-i İstanbul’da sâkin olan re‘âyâdan beher sene cânib-i mîrîden teklîf olunan şem‘ bedelini cem‘ ve tahsîl edip cânib-i mîrîye teslîm etmek için tarafımızdan vekîl nasb edip irsâl eylemiş idik mezbûr dahi vekâlet-i merkūmeyi kabûl ve hizmet-i lâzımesini edâya [mü]te‘ahhid oldukdan sonra gelip mahmiye-i mezbûrede sâkin olan re‘âyâdan şem‘ bedelini vekâleti hasebiyle cem‘ ve tahsîl edip cânib-i mîrîye teslîm eyleyip zimmetinde otuz yedi bin nakd-i râyic fi’l-vakt fıddî akçe bâkī kalmışidi vâki‘ hâl suâl olunup meblağ-ı mezbûru hâlik-i merkūmun muhallefâtından bize teslîm etmek için merkūm Paroş’a kıbel-i şer‘den tenbîh olunması matlûbumuzdur dediklerinde gıbbe’s-suâl mezbûr Paroş fi’l-vâki‘ karındaşım hâlik-i mezbûr Todori’nin vech-i muharrer üzre zimmetinde edâsı lâzım otuz yedi bin nakd-i râyic fi’l-vakt fıddî akçe bâkī kalmışdır deyû bi’t-tav‘i’s-sâf ikrâr ve i‘tirâf ile cevâb vermeğin meblağ-ı mezbûru hâlik-i merkūmun muhallefâtından edâ etmek üzre ikrârı mûcebince tenbîh olunup mâ hüve’l-vâki‘ gıbbe’t-taleb ketb olundu. Târihuhü’l-mezbûr. Şuhûdül-hâl: Es-Sâbıkûn.