Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 327 Hüküm no: 410 Orijinal metin no: [66b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tahtakadı Vakfı Mescid ve Zaviyesi Vakfı mütevellisinin zaviye ve mescidde yapmış olduğu tamiratın keşfi Sâhibü’l-hayrât ve’l-hasenât Tahtakadı demekle ma‘rûf merhûm Muslihiddin Efendi b. el-merhûm Şemseddin Efendi’nin Havâss-ı Refî‘a kazâsı müzâfâtından Kağıdhâne nâm karyede vâki‘ tarafeynden es-Seyyid Receb ve Mehmed mülkleri ve tarafeynden mekābir-i müslimîn ve tarîk-i âm ile mahdûd Mescid-i şerîf ve zâviyesi evkāfı mütevellîsi olan bâ‘is-i hâze’l-kitâb Mahmud Çelebi b. Mehmed nâm bevvâbü’s-sultânî mahfil-i kazâya gelip takrîr-i kelâm ve bast-ı merâm edip zikr olunan mescid-i şerîf ve zâviye-i merkūme harâba müşrif olup ba‘zı mevâzi‘i tecdîd-i binâya ve ba‘zı imâret ve meremmete muhtâc olmağın mukaddemâ cânib-i şer‘den me’zûn olup evkāf-ı mezbûrenin gallesinden hâsıl olan mal ile ba‘zı yerleri ve ba‘zı yerlerini imâret ve meremmet eylemişidim hâlâ üzerine varılıp harc ve sarf eylediğim meblağın mertebe-i tahammülü keşf ve tahrîr ve tahmîn-i sahîh ile tahmîn olunması matlûbumdur dedikde bu fakīr Hâssa mi‘mârlarından el-Hâc Hasan b. Ömer ve üstâd Mehmed b. Abdullah ile ve zâviye-i merkūmede berât-ı sultânî ile bi’l-fi‘l şeyh olan mefharü’l-vâ‘izîn eş-Şeyh Nasrullah b. el-merhûm eş-Şeyh Ömer Efendi ve sâir ebniye ve sukūfa vukūfu olup zeyl-i kitâbda mastûrü’l-esâmî olan müslimîn ile zikr olunan mescid-i şerîf ve zâviye-i merkūmenin üzerine varıp müşâhede ve mu‘âyene olundukdan sonra merkūm el-Hâc Hasan ve üstâd Mehmed müteveffâ-yı mezbûrun zâviye-i merkūmede tarîk-i âm cânibinde müceddeden binâ eylediği taş duvarı mesâha eylediklerinde bennâ zirâ‘ı ile tûlen on altı buçuk ve kadden dört bi hesâb-ı şatrancî altmış altı zirâ‘ taş duvarın her bir zirâ‘ı otuzar akçeden bin dokuz yüz seksen akçe ve zikr olunan duvarın tûlen on sekiz ve arzen iki bi hesâb-ı şatrancî otuz iki zirâ‘ sakfının her bir zirâ‘ı on sekizer akçeden altı yüz kırk sekiz akçe ve mescid-i şerîfin iki pencere demiri çerçevesi ile ve sâir levâzımı ile bin iki yüz elli akçe ve mescid-i şerîfin sol cânibinde olan yan odasında tûlen ve arzen yirmi üç zirâ‘ dolma duvarın her bir zirâ‘ı otuzar akçeden altı yüz doksan akçe ve mescid-i şerîfin ve zâviye-i merkūmenin tûlen yirmi sekiz ve arzen yirmi beş bi hesâb-ı şatrancî yedi yüz zirâ‘ sakfının meremmeti için her bir zirâ‘ı üçer akçeden iki bin yüz akçe ve tavan meremmetine dahi bin seksen akçe ve mescid-i şerîfin sol cânibinde olan odada müteveffâ-yı mezbûrun müceddeden binâ eylediği ocak için ber vech-i maktû‘ üç yüz akçe ve müceddeden binâ olunan tahta havluda olan dört yüz yetmiş sekiz aded kestane tahtasının her biri altışar akçeden iki bin sekiz yüz altmış sekiz akçe ve minâre kurbunda olan tahtapûş için ber vech-i maktû‘ dört yüz altmış sekiz akçe ve müceddeden binâ olunan minâre ve nerdübân için ber vech-i maktû‘ yedi yüz akçe ve mescid-i şerîfin yanında otuz sekiz aded binârın her biri altışar akçeden iki yüz yirmi sekiz akçe ve kırk yedi aded dizmenin her biri on ikişer akçeden beş yüz altmış dört akçe ve sofalar meremmetine dört yüz akçe ve sâir mesârif-i müteferrikası için altı yüz doksan sekiz akçe ki cem‘an on dört bin yirmi dört akçe ile ancak olur, bundan ekal ile olmak mümkün değildir deyû her biri icmâ‘ ve ittifâk eylemeğin mâ hüve’l-vâki‘ gıbbe’t-taleb ketb olundu. Fi’l-yevmi’r-râbi‘ aşer min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Fahrü’l-müderrisîn Avnullah Efendi b. el-merhûm eş-Şeyh Ömer, Yusuf Efendi b. Bayram el-Hatîb, Mustafa Çelebi b. Mehmed, Ali Efendi b. Mustafa, Mehmed b. el-Hâc Ahmed, Receb Efendi b. Abdi, Ahmed b. Ali, Abdülkādir b. Mehmed el-Eyyûbî.