Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 328 Hüküm no: 411 Orijinal metin no: [66b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Mehmed’in menzil hissesini annesi Âişe bt. Mehmed’e hibe etmesi Medîne-i Hazret-i Ebî Eyyûb el-Ensârî mahallâtından Baba Haydar mahallesi sükkânından Hüseyin b. Mehmed nâm kimesne mahfil-i kazâda vâlidesi râfi‘at-i hâze’l-kitâb Âişe bt. Mehmed nâm hâtun muvâcehesinde bi tav‘ihî ikrâr ve i‘tirâf edip mahalle-i mezbûrede vâki‘ bir tarafdan Hasan Ağa b. Abdullah mülkü ve bir tarafdan Mahmud Çelebi el-Hammâmî mülkü ve bir tarafdan vakıf menzil ve taraf-ı râbi‘den tarîk-i âm ile mahdûd dâhiliyye ve hâriciyyeyi hâvî olup dâhiliyyesi iki bâb tahtânî odayı ve iki sofayı ve bi’r-i mâyı ve zât-ı eşcâr-ı müsmire ve gayr-ı müsmire [67a] bahçeyi ve hâriciyyesi iki bâb fevkānî odayı ve altında ahırı müştemil olup, vâlidem mezbûre Âişe Hâtun ve babam Mehmed b. İbrahim ile beynimizde ale’l-iştirâki’s-seviy müşterek olduğumuz menzilin üç hissede bir hisse-i mahzımı vâlidem mezbûre Âişe Hâtun’a ba‘de’t-tahliyyeti’ş-şer‘iyye hibe ve teslîm edip ol dahi meclis-i hibede ittihâb ve tesellüm edip ba‘de’l-yevm mülk-i mevhûbu olmuşdur. Keyfe mâ teşâ’ ve tahtâr mutasarrıfe olsun dedikde gıbbe’t-tasdîki’ş-şer‘î vicâhen ketb olundu. Hurrire fi’l-yevmi’l-ışrîn min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Eş-Şeyh Ali b. eş-Şeyh Şemseddin, Mustafa Beşe b. Abdullah, Osman Beşe b. Abdullah er-Râcil, Mehmed b. Abdullah, Bekir Beşe b. Mehmed.