Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 228 Hüküm no: 227 Orijinal metin no: [29a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Mehmed’in, Ahmed Beşe b. Mehmed’den muhâlaa yoluyla boşandığı Mahmiye-i İstanbul’da Molla Hüsrev mahallesinde vâki‘ ekmekçi oğlu odaları sâkinelerinden Âişe bt. Mehmed nâm hâtun meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda zevc-i dâhilün-bihâsı Ahmed Beşe b. Mehmed nâm kimesne mahzarında bi’t-tav‘i’s-sâf ikrâr ve i‘tirâf edip zevcem mezbûr Ahmed Beşe ile yedimden makbûz nakid râyic fi’l-vakt iki bin akçe ve zimmetinde mütekarrir ve ma‘kūdun-aleyh olan dört bin akçe mehr-i müeccel-i müsemmâm ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzre muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra zevciyyete müte‘allika âmme-i de‘âvîden her birimiz âharı ibrâ eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurreti Cumâdelâhire li sene seb‘a ve seb‘în ve elf. Şuhûdü’l-hâl: Mehmed Efendi b. İbrahim, Hüseyin Ağa b. ( ) Subaşı hâlâ, Receb Ağa Asesbaşı, Abdullah Çelebi b. ( ).