Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 228 Hüküm no: 228 Orijinal metin no: [29a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ticaret için gittiği Tebriz’de vefat eden Seyyid Musa’nın terekesi hususunda hanımı ve kardeşi arasındaki davada, daha sonra kardeşiyle nikâhlanıp boşanacak olan hanımının haksız olduğu Efendi hazretleri imzâsıyla Tüccâr tâifesinden olup bundan akdem diyâr-ı Acem’de medîne-i Tebriz’de ticâret üzre iken vefât eden es-Seyyid Musa Çelebi b. Hacı Ali’nin verâseti zevce-i metrûkesi Safa Hâtun bt. Osman ile sulbiye kızı Şerîfe Fâtıma’ya ve li ebeveyn karındaşı Seyyid Mustafa Çelebi’ye münhasıra olup ba‘de’l-kısme mezbûre Şerîfe Fâtıma dahi vefât edip verâseti vâlidesi merkūme Safa Hâtun ile ammisi [29b] merkūm Seyyid Mustafa Çelebi’ye münhasıra olduğu şer‘an zâhir ve mütehakkik oldukdan sonra merkūme Safa Hâtun tarafından husûs-ı âti’l-beyâna vekîl-i müsecceli olan Hüseyin Çelebi nâm kimesne meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda tereke-i müteveffâ-yı evvel mezbûr Seyyid Musa Çelebi’ye vâzı‘ü’l-yed olan merkūm Seyyid Mustafa Çelebi mahzarında bi’l-vekâle da‘vâ ve takrîr-i kelâm edip müvekkilem mezbûre Safa Hâtun’un zevci müteveffâ-yı merkūm zimmetinde mütekarrir ve ma‘kūdun-aleyh olan otuz bin akçe mehr-i müeccelini ve defter-i kassâm mûcebince cümle muhallefâtı olan on bin dokuz yüz yirmi guruşdan sümün hissesi olan bin üç yüz altmış beş guruşu ve sagīre-i merkūmeden dahi ber mûceb-i defter-i kassâm kendiye isâbet eden sülüs hisse-i ma‘lûmesini mukaddemâ merkūm Seyyid Mustafa Çelebi yedinden ahz u kabz edip ba‘dehû müvekkilem merkūmeyi merkūm Seyyid Mustafa Çelebi on yedi bin beş yüz akçe mehr-i müeccel ile tezevvüc edip iki sene mürûrundan sonra merkūmeyi bâyinen tatlîk eylediğinde mehr-i müecceli olan meblağ-ı mezbûr on yedi bin beş yüz akçeyi ve nafaka-i iddet ve me’ûnet-i süknâsı için ta‘yîn olunan iki bin beş yüz akçe ki cem‘an yirmi bin akçeyi dahi merkūm Seyyid Mustafa Çelebi yedinden merkūme Safa Hâtun tamâmen alıp kabz etmişidi, lâkin müteveffâ-yı evvel merkūm Seyyid Musa Çelebi’nin defter-i kassâmdan hâric medîne-i mezbûrede beytülmâl emîni yedinde olan bin beş yüz guruş terekesini dahi ahz u kabz etmeğin meblağ-ı mezbûrdan dahi müvekkile-i mezbûreye isâbet eden hisse-i şer‘iyyesini merkūm Seyyid Mustafa Çelebi’den bi’l-vekâle taleb ederim suâl olunsun dedikde gıbbe’s-suâl ve’l-inkâr vekîl-i merkūmdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ tereke-i müteveffâ-yı mezbûrdan medîne-i mezbûrede beytülmâl emîni yedinden minvâl-i muharrer üzre defter-i kassâmdan harîc bin beş yüz guruşu ahz u kabz etmediğine merkūm Seyyid Mustafa Çelebi’ye yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebince bilâ-beyyine vekîl-i merkūm mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’r-râbi‘ min Cemâziyelevvel li sene seb‘a ve seb‘în ve elf. Şuhûdü’l-hâl: eş-Şeyh İvaz Efendi, Mehmed Bey b. İsmail, Mehmed Çavuş el-Mübâşir, Şaban Ağa b. Süleyman.