Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 361 Hüküm no: 459 Orijinal metin no: [75a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hatun bt. Abdullah’ın menzilini Ali Çelebi b. Yusuf’a sattığı Medîne-i Hazret-i Ebî Eyyûb el-Ensârî mahallâtından Ahmed Dede mahallesi sâkinelerinden Fâtıma Hâtun bt. Abdullah tarafından bey‘-i âti’z-zikri ve kabz-ı semeni ikrâra vekîl olup mezbûre Fâtıma’yı ma‘rifet-i şer‘iyye ile ârifeyn olan Receb b. Abdullah ve Veli Halîfe b. İshak el-Müezzin şehâdetleri ile şer‘an vekâleti sâbite olan Pîrî Bey b. İbrahim mahfil-i kazâda işbu hâmilü’l-kitâb Ali Çelebi b. Yusuf mahzarında bi’l-vekâle ikrâr ve takrîr-i kelâm edip müvekkilem mezbûre Fâtıma mahalle-i mezbûrede vâki‘ bir tarafdan yine kendi mülkü ve bir tarafdan ba‘zan Arslan mülkü ve ba‘zan Ümmühâni Hâtun mülkü ve iki tarafdan tarîk-i âm ile mahdûd tûlen otuz altı ve arzen on sekiz zirâ‘ arsa üzerinde mebniye iki bâb fevkānî beyti ve altında sofalı ve bi’r-i mâ ve zât eşcâr-ı müsmire ve gayr-ı müsmire muhavvatayı müştemil mülk menzilini, cümle tevâbi‘ ve levâhıkı ile târih-i kitâbdan bir sene mukaddem mezbûr Ali Çelebi’ye fıddî nakd-i râyic fi’l-vakt dokuz bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm eyledikden sonra semen-i mezbûr dokuz bin akçeyi bi’t-tamâm ve’l-kemâl müşterî-i mezbûr Ali Çelebi yedinden ahz ve kabz eylemişidi zikr olunan menzil-i mezbûr Ali Çelebi’nin mülk-i müşterâsı olmuşdur dedikde vekîl-i mezbûr Pîrî Bey’in minvâl-i meşrûh üzre bi’l-vekâle sâdır olan ikrârını el-mukarru lehü’l-merkūm Ali Çelebi bi’l-muvâcehe tasdîk ve bi’l-müşâfehe tahkīk edicek mâ vaka‘a bi’t-taleb ketb olundu. Tahrîren fi’l-yevmi’l-ışrîn min Zilka‘de li sene seb‘a ve erba‘în ve elf. Şuhûdü’l-hâl: Ramazan Halîfe b. Yunus el-İmâm, Abdullah Halîfe b. Abdullah el-İmâm, Kulu b. İsa, Abdünnebi b. Abdünnebi, Veli b. Bayram, Osman b. Hüseyin, Ali Çelebi b. Mustafa, Mahmud b. Ahmed, Mustafa b. Veli, Ali b. Mustafa ve gayruhüm.