Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 361 Hüküm no: 458 Orijinal metin no: [74b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. İlya’nın Nikola v. Yani aleyhindeki alacak davasında sulh olması Mahmiye-i İstanbul’da Unkapanı zimmîlerinden Yani v. İlya nâm zimmî mahfil-i kazâda Havâss-ı Aliyye müzâfâtından kasaba-i Ereğli zimmîlerinden Nikola v. Yani nâm zimmî mahzarında ikrâr ve takrîr-i kelâm edip mukaddemâ mezbûr Nikola’ya bana buğday alıvermek için bin fıddî râyicü’l-vakt akçe teslîm edip ol dahi minvâl-i muharrer üzre ahz ve kabz etmişidi ile’l-ân benim için buğday alıvermemekle meblağ-ı merkūmu mezkûrdan da‘vâ ve taleb eylediğimde inkâr edip [75a] beynimizde münâza‘ât-ı kesîre vâkı‘a olmağın aramıza muslihûn tavassut edip husûs-ı mesfûru iki bin beş yüz râyicü’l-vakt fıddî akçeye sulh eylediklerinde ben dahi meblağ-ı mezbûru kabûl ve bedel-i sulhü bi’t-tamâm mezkûr Nikola yedinden ahz ve kabz edip meblağ-ı bâkīye müte‘allik da‘vâdan zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim ba‘de’l-yevm bir tarîk ile bi’z-zât ve bi’l-vâsıta da‘vâ ve nizâ‘ sâdır olursa lede’l-hükkâmi’l-kirâm mesmû‘a olmaya dedikde gıbbe’t-tasdîki’ş-şer‘î vicâhen mâ vaka‘a bi’t-taleb ketb olundu. Fi’l-yevmi’l-âşir min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Ali Çelebi b. Hamza el-Mübâşir, Mustafa Beşe b. Mahmud er-Râcil, Ali b. Mustafa, Mustafa b. Veli, Yakub b. Kurd.