Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 363 Hüküm no: 461 Orijinal metin no: [75a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman b. Ali’nin kira bedeli davasının reddi Medîne-i Hazret-i Ebî Eyyûb el-Ensârî mahallâtından Câmi‘-i Kebîr mahallesinde sâkin Süleyman b. Ali nâm bakkal medîne-i mezbûrede sâkin Angeli v. Manol nâm zimmîyi meclis-i şer‘a ihzâr ve mahzarında üzerine takrîr-i da‘vâ edip medîne-i mezbûrede Yoğurtçular sûkunda vâki‘ beyne’l-ahâlî ma‘lûmü’l-hudûd ekmekçi fırınımı târih-i kitâbdan on ay mukaddem ayda dokuz yüz doksanar akçeye mezbûr Angeli’ye îcâr ve teslîm, ol dahi istîcâr ve kabz edip beş ay tamâmına gelince ücret-i merkūmesin bi’d-defe‘ât ahz ve kabz eylemiş idim hâlâ beş ay dahi mürûr edip zimmetinde dört bin dokuz yüz elli akçe ücret müctemi‘a olmuşdur vermekden imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Angeli cevâbında, fi’l-vâki‘ zikr olunan ekmekçi fırınını târih-i kitâbdan on ay mukaddem ayda dokuz yüz doksanar akçeye istîcâr etmiş idim lâkin beş [ay] müctemi‘ olan ücreti verip akd-i icâreyi kendi rızâsıyla fesh edip ol fırını yedine teslîm eylemiş idim hâlâ zimmetimde edâsı lâzım ücret yokdur dedikde gıbbe’l-istintâk mezbûr Süleyman fesh-i mezkûru inkâr edicek merkūm Angeli’den beyyine taleb olundukda, udûl-i ricâlden Mustafa Efendi b. Ali el-İmâm ve Ali Çelebi b. Mustafa nâm kimesneler meclis-i şer‘a li ecli’ş-şehâde hâzırân olup gıbbe’l-istişhâd fi’l-vâki‘ târih-i kitâbdan beş ay mukaddem mezbûr Angeli bizim huzûrumuzda merkūm Süleyman’ın rızâsıyla fesh-i akd-i icâre edip zikr olunan fırını yedine teslîm eylemişidi biz bu husûsa şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyetihî şerâiti’l-kabûl şehâdetleri makbûle olmağın mûcebiyle mesfûr Süleyman’ı mütâlebeden men‘ birle mâ vaka‘a bi’t-taleb ketb olundu. Tahrîren fi’l-yevmi’s-sâmin [min] Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Mustafa b. Mehmed, Mustafa b. Ahmed, Ali b. Mustafa, Yakub b. Kurd, Mustafa b. Veli, Mustafa Beşe Çukadâr, Ali b. Mustafa ve gayruhüm.