Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 363 Hüküm no: 462 Orijinal metin no: [75b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Hızır’ın annesi Ümmühani bt. Abdullah’ın terekesindeki hissesini teslim aldığı Mahmiye-i Kostantıniyye mahallâtından Çavuş mahallesi sâkinelerinden iken bundan akdem müteveffât olan Ümmühâni bt. Abdullah’ın verâseti zevc-i metrûkü Mustafa Beşe b. Mehmed ve sadrî sagīr oğlu Mehmed ve zevc-i âhardan sadrî sagīr oğlu İbrahim b. Hızır’a münhasıra olduğu şer‘an mütebeyyin oldukdan sonra sagīr-i mezbûr İbrahim’in tesviye-i umûruna kıbel-i şer‘den mansûb vasîsi olan Mehmed Beşe b. Murad mahfil-i kazâda müteveffât-ı mezbûrenin terekesine vâzı‘ü’l-yed olan işbu hâmilü’l-kitâb zevci mezbûre Mustafa Beşe mahzarında bi’l-vesâye ikrâr ve takrîr-i kelâm edip sagīr-i mezbûr İbrahim vâlidesinden müteveffât-ı mezbûre Ümmühâni’nin muhallefâtından isâbet eden iki bin iki yüz yetmiş akçe hisse-i şer‘iyyesini vesâyet-i mahkiyem hasebiyle mezbûr Mustafa Beşe yedinden tamâmen alıp kabz eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-âşir min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Mehmed Çavuş b. Mehmed, Ali b. Mustafa, Mustafa b. Ali, Edhem b. Mehmed, Mehmed Çelebi b. ( ), Mustafa Çelebi b. ( ), Mehmed b. Halil, Yusuf b. Mehmed, Mustafa b. Şaban el-Müezzin, Mahmud b. Ahmed.