Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 367 Hüküm no: 470 Orijinal metin no: [76a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kaya Bey b. Hüseyin’in menzilini Kenan b. Abdullah’a sattığı Havâss-ı Aliyye kazâsı müzâfâtından Terkos nâhiyesine tâbi‘ Hacı Mihaliç nâm karye sâkinlerinden Kaya Bey b. Hüseyin nâm kimesne meclis-i şer‘-i hatîr-i lâzımü’t-tevkīrde işbu hâmilü’l-kitâb Kenan b. Abdullah mahzarında bi’t-tav‘i’s-sâf ikrâr ve i‘tirâf edip karye-i mezbûrede vâki‘ bir tarafdan Beşir Ağa mülkü ve bir tarafdan tarîk-i âm ve iki tarafdan karye-i mezbûre mer‘âsıyla mahdûd bir bâb tahtânî beyti ve zât-ı eşcâr-ı müsmire ve gayr-ı müsmireli mülk menzilimi, cümle tevâbi‘ ve levâhıkı ile mezbûr Kenan’a fıddî nakd-i râyic fi’l-vakt üç bin beş yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm eyledikden sonra semen-i mezbûr üç bin beş yüz akçeyi bi’t-tamâm ve’l-kemâl mezbûr Kenan yedinden ahz ve kabz eyledim ba‘de’l-yevm zikr olunan menzil-i mezbûr Kenan’ın mülk-i müşterâsı olmuşdur. Keyfe mâ yeşâ’ ve yahtâr mutasarrıf olsun dedikde mukırr-ı mezbûr Kaya Bey’in minvâl-i meşrûh üzre cârî olan ikrârını el-mukarru lehü’l-merkūm Kenan vicâhen tasdîk ve tahkīk etmeğin mâ vaka‘a gıbbe’t-taleb ketb olundu. Târihuhü’l-mezbûr. Şuhûdü’l-hâl: Es-Sâbikūn.