Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 367 Hüküm no: 469 Orijinal metin no: [76a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kurd b. Abdullah’ın menzil hissesinin Beytülmal emini tarafından Kaya Bey b. Hüseyin’e satıldığı Havâss-ı Aliyye kazâsında beytülmâl emîni olan fahrü’l-akrân Süleyman Bey b. Hasan mahfil-i kazâda işbu hâmilü’l-kitâb Kaya Bey b. Hüseyin mahzarında ikrâr ve takrîr-i kelâm edip Havâss-ı mezbûre müzâfâtından Terkos nâhiyesine tâbi‘ Hacı Mihaliç nâm karyede sâkin iken bilâ-vâris fevt olup, terekesi beytülmâle âid olan Kurd b. Abdullah’ın karye-i mezbûrede vâki‘ mezbûr Kaya Bey ile ale’l-iştirâki’s-seviy mutasarrıf oldukları bir tarafdan Sefer Bey mülkü ve bir tarafdan tarîk-i âm ve iki tarafdan karye-i mezbûre mer‘âsıyla mahdûd bir bâb tahtânî beyti ve zât eşcâr-ı müsmire ve gayr-ı müsmire muhavvatayı müştemil mülk menzilin nısf-ı şâyi‘ini, ba‘de’l-müzâyede semeni misli olan fıddî nakd-i râyic fi’l-vakt bin akçeye şerîki olan mezbûr Kaya Bey’e emânetim hasebiyle tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm eyledikden sonra semen-i mezbûr bin akçeyi tamâmen Kaya Bey’in yedinden alıp kabz eyledim hâlâ sâlifü’z-zikr olan menzilin cümlesi mezbûr Kaya Bey’in mülk-i müşterâsı olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Târihü’l-mezbûr. Şuhûdü’l-hâl: Es-Sâbikūn.