Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 368 Hüküm no: 472 Orijinal metin no: [76b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Corci v. Papa Kostantin’in kızı Zoyi’yi boşaması karşılığında dâmâdı Pavlaki ile annesi ve kardeşinde olan alacaklarından vazgeçtiği Mahmiye-i Galata müzâfâtından Arnavudköyü demekle ma‘rûfe olan karye sükkânından Corci v. Papa Kostantin nâm zimmî mahfil-i kazâda sulbiye kebîre kızı Zoyi nâm Nasrâniyenin zevc-i muhâli‘i olan Pavlaki v. Panyoli ve ikrâr-ı âti’z-zikri tasdîka kendi cânibinden asıl ve vâlidesi Tomayi bt. Todori nâm Nasrâniye tarafından vekîl olup hasm-ı câhid mahzarında nehc-i şer‘î üzre vekâleti sâbite olan merkūm Pavlaki’nin karındaşı Yorgi nâm zimmîler muvâcehelerinde ikrâr ve takrîr-i kelâm edip mezbûr Pavlaki zimmetinde cihet-i karz-ı şer‘îden yetmiş sekiz bin akçe ve karındaşı merkūm Yorgi ile vâlidesi merkūme Tomayi zimmetlerinde dahi kezâlik cihet-i karz-ı şer‘îden iki yüz altmış kıt‘a esedî guruş hakkım olup lâkin kızım mezbûre Zoyi zevci merkūm Pavlaki ile hul‘a tâlibe olup merkūm Pavlaki imtinâ‘ etmekle ben dahi eğer kızım mezbûre Zoyi ile hul‘ olursanız senin zimmetini ve karındaşın ile vâlidenin zimmetlerini meblağ-ı mezbûrdan ibrâ edeyim deyû mukaddemâ va‘d etmişidim hâlâ mezbûr Pavlaki kızım mezbûre Zoyi ile hul‘ olmağın zikr olunan yetmiş sekiz bin akçe hakkından mezbûr Pavlaki’nin ve iki yüz altmış kıt‘a esedî guruş hakkımdan merkūm Yorgi ile vâlideleri mezbûre Tomayi’nin zimmetlerini ibrâ-i âmm-ı kātı‘ü’n-nizâ‘ ile ibrâ ve iskāt eyledim min ba‘d zimmetlerinde bir akçe ve bir habbe hakkım kalmadı dedikde mukırr-ı merkūm Corci’nin takrîr-i meşrûhunu mezbûr Pavlaki asâleten ve merkūm Yorgi vekâleten ve asâleten vicâhen ve şifâhen tasdîk ve tahkīk etmeğin mâ hüve’l-vâki‘ gıbbe’t-taleb ketb olundu. Fi’l-yevmi’s-sâbi‘ min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Fahrü’l-müderrisîni’l-kirâm Hasan Efendi b. Mehmed Nezir eş-şehîr bi Canımzâde Sunullah Efendi b. eş-Şeyh Mehmed el-Müderris, es-Seyyid Ebü’l-fazl Efendi b. el-merhûm es-Seyyid Mehmed, es-Seyyid Fazlullah Çelebi ahi’l-mezbûr, Mehmed Çavuş el-Mübâşir, Ahmed Bey el-Cündî, Ali Beşe b. Abdullah, Mustafa b. Ahmed, Ali b. Mustafa, Mustafa Çelebi b. Veli ve gayruhüm, Kostantin ve Manol, Kurd v. Dimitri, Panayot v. Dimitri, Yorgi v. Piro, Zoto v. Nikola, Todori v. Manol, Argiri v. Todori, Panayot v. Nikola, Tohar v. Andriye, Yorgi v. Tonya.