Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 369 Hüküm no: 473 Orijinal metin no: [76b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zoyi bt. Corci’nin eşi Pavlaki v. Manoli’den boşanarak birbirlerinin zimmetlerini ibra etmeleri Mahmiye-i Galata müzâfâtından Arnavudköyü demekle ma‘rûfe olan karyede sâkine işbu bâ‘isetü’l-kitâb Zoyi bt. Corci nâm zimmiye tarafından vech-i âtî üzre hul‘ ve ibrâya vekîl olup nehc-i mu‘teber-i mer‘î üzre Sivastos v. Yorgi ve Panayot v. Nikola nâm zimmîler şehâdetleri ile şer‘an vekâleti sâbite olan Kanilo v. Farandilos nâm zimmî meclis-i şer‘-i şerîfde mezbûrenin zevci Pavlaki v. Manoli nâm zimmî muvâcehesinde müvekkilesi mezbûre Zoyi’nin merkūm Pavlaki zimmetinde mikdârı beynlerinde ma‘lûm olan mehr-i müecceli ve mezbûrenin mülkü olup merkūm Pavlaki yedinde makbûzu olan iki yüz guruş kıymetli iki elmas hâtem ile her birinin vezni beynlerinde ma‘lûm altından masnû‘ iki kutu ve gümüşden masnû‘ bir tepsi ve yine beynlerinde kıymetleri ma‘lûm altun sırma ile münakkaş bir tülbent makrama ve gümüş sırma ile münakkaş bir tülbent makrama ve Rûsiyyetü’l-asl Satı ve Perestü nâm câriyeler üzerine vekâleten mezbûr Pavlaki ile muhâla‘a-i sahîha-i şer‘iyye ile hul‘ edip merkūm Pavlaki dahi vech-i muharrer üzre olan hul‘u meclis-i merkūmede kabûl eyledikden sonra vekîl-i mezbûr Kanilo merkūm Pavlaki’nin zimmetini bi’l-vekâle ve mezbûr Pavlaki dahi müvekkilem mezbûrenin zimmetini bi’l-asâle zevciyyete ve eşyâ-i merkūme ve gayra müte‘allik cemî‘ da‘vâ ve mütâlebât ve eymân ve muhâsamâtdan ibrâ-i âmm-ı kātı‘ü’n-nizâ‘ ile ibrâ ve iskāt etmeğin mâ hüve’l-vâki‘ gıbbe’t-taleb ketb olundu. Fi’l-yevmi’s-sâbi‘ min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Es-Sâbikūn.