Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 231 Hüküm no: 232 Orijinal metin no: [29b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen İbrahim Çorbacı’nın çocuklarının Ali b. Mehmed’e açtıkları alacak ve tereke davasından vazgeçtikleri Fi’l-asl vilâyet-i Anadolu’da kasaba-i Bilecik sükkânından olup bundan akdem mahmiye-i İstanbul’da Kırkçeşme kurbunda sâkin iken vefât eden İbrahim Çorbacı’nın verâseti sulbî kebîr oğlu İsmail Çelebi ile sulbiye kebîre kızları Âişe ve Fâtıma’ya münhasıra olduğu şer‘an zâhir ve mütebeyyin oldukdan sona mezbûretân Âişe ve Fâtıma meclis-i şer‘-i hatîrde müteveffâ-yı mezbûrun li ebeveyn kız karındaşı oğlu Ali b. Mehmed nâm kimesne mahzarında [30a] her biri tâyi‘aten ikrâr ve takrîr-i kelâm edip babamız müteveffâ-yı mezbûr İbrahim Çorbacı târih-i kitâbdan on beş sene mukaddem hâl-i hayâtında mezbûr Ali Beşe’ye yüz yirmi yedi re’s koyun def‘ ve teslîm ol dahi ahz u kabz edip ba‘dehû babamız mezbûr vefât ettikde zikr olunan koyunun yüz on yedi re’sinden bize isâbet eden hissemizi merhûm Ali Beşe yedinden alıp kabz edip bâkī on koyun ile zikr olunan koyunun on beş senede hâsıl olan mahsûlâtından dahi bize isâbet eden hissemizi merkūm Ali Beşe’den da‘vâ ve taleb eylediğimizde ol dahi vech-i muharrer üzre on beş senede zikr olunan koyunun harcını bizden da‘vâ etmeğin beynimizde küllî nizâ‘ vâki‘ olmuşidi el-hâletü hâzihî vech-i meşrûh üzre olan da‘vâmızdan ve sâir babamız müteveffâ-yı mezbûrun terekesine müte‘allika cemî‘ de‘âvî ve mütâlebâtdan her birimiz mezbûr Ali Beşe’nin zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis min Cumâdelâhire li sene seb‘a ve seb‘în ve elf. Şuhûdü’l-hâl: El-Hâc Halil Çorbacı, Şükrullah Bey b. Mustafa, Gazanfer Bey b. Tevekkül, Mehmed Çelebi b. Abdullah.