Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 374 Hüküm no: 482 Orijinal metin no: [77b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Efendi b. Mahmud’un menzilinin bir bölümünü Kâmuran bt. Abdullah’a sattığı Husûs-ı âti’z-zikrin tahrîr olunması iltimâs olunmağın küttâb-ı mahkemeden mevlânâ Abdülkādir Efendi b. Mehmed Efendi irsâl olunup ol dahi zeyl-i kitâbda mastûrü’l-esâmî olan müslimîn ile medîne-i Hazret-i Ebî Eyyûb el-Ensârî -radiye anhu [78a] Rabbühü’l-Bârî-mahallâtından Câmi‘-i Kebîr mahallesinde sâkin Mehmed Efendi b. Mahmud’un menziline varıp akd-i meclisü’ş-şer‘î eylediklerinde mezbûr Mehmed Efendi meclis-i merkūmda işbu sâhibü’l-kitâb Kâmuran bt. Abdullah nâm hâtun mahzarında bi’t-tav‘i’s-sâf ikrâr ve i‘tirâf edip mahalle-i merkūmede vâki‘ iki tarafı Bakırî Muslihiddin Efendi vakfı ve bir tarafı Taşçı Mehmed Bey vakfı ve bir tarafı tarîk-i âm ile mahdûd olup dört bâb fevkānî odaları ve iki sofayı ve bir tahtânî odayı ve ahırı ve bir bâb dükkânı ve fırını ve kenîfi ve bi’r-i mâyı ve muhavvatayı müştemil olan mülk menzilimden mezbûr Taşçı Mehmed Bey vakfı tarafından iki bâb fevkānî odaları ve bir sofayı ve tahtânî bir odayı ve bir mikdâr muhavvatayı ki zikr olunan bi’r-i mâ’ın nısfı üzerinde tahdîd ve kısmet ve ifrâz ettiğimden sonra mezbûre Kâmuran’a fıddî nakd-i râyic fi’l-vakt on bin akçeye bey‘-i bâtt-ı sahîh-i şer‘î ile bey‘ ve teslîm edip ol dahi iştirâ ve tesellüm eyledikden sonra zimmetinde bana deyni olan on bin akçeden mezbûre Kâmuran’ın zimmetini ibrâ ve iskāt eyledim dedikde mezbûre Kâmuran dahi mukırr-ı mezbûru bi’l-muvâcehe tasdîk ve bi’l-müşâfehe tahkīk eylediğin mevlânâ-yı mezbûr mahallinde tahrîr, ba‘de[hû] meclis-i şer‘de inhâ ve takrîr etmeğin mâ vaka‘a gıbbe’t-taleb ketb ve imlâ ve mezbûre Kâmuran’ın yedine def‘ ve i‘tâ olundu. Fi’l-yevmi’r-râbi‘ aşer min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Şeyh Nasrullah Efendi b. el-merhûm eş-Şeyh Ömer Efendi, Kıdvetü’l-müderrisîn Avnullah Efendi, Ömer Halîfe b. eş-Şeyh Nasrullah Efendi, Mehmed Çelebi b. Avnullah Efendi, Ömer Efendi b. Abdullah Efendi, Mustafa Halîfe b. Mehmed, Ali b. Mustafa, Mustafa Çelebi b. Mehmed er-Râcil, Mehmed Çelebi b. Bayram, Mehmed b. Osman, Mansur b. Mehmed, Abdülkādir b. Abdülkādir, Abdurrahman Çelebi b. Mehmed.