Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 374 Hüküm no: 481 Orijinal metin no: [77b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstato v. Miro’nun menzilini Dimo v. Yani’ye sattığı Vilâyet-i Rumeli’nde Ergirikasrı kazâsına tâbi‘ Serakine nâm karye zimmîlerinden İstato v. Miro nâm zimmî mahfil-i kazâda işbu râfi‘ü’l-kitâb Dimo v. Yani nâm zimmî muvâcehesinde ikrâr ve takrîr-i kelâm edip karye-i merkūmede vâki‘ babam Miro nâm hâlikden bana irsle intikāl edip bir tarafı Dimo v. Kirih mülkü ve bir tarafı Kondi v. Hristo mülkü ve bir tarafı tarîk-i âm ve bir tarafı vâdi ile mahdûd bir bâb tahtânî odayı ve zât eşcâr-ı müsmire muhavvatayı müştemil yedimde olan mülk-i mevrûsumu mezbûr Dimo’ya sekiz bin nakd-i râyic fi’l-vakt fıddî akçeye bey‘-i bât ile bey‘ edip ol dahi iştirâ ettikden sonra semen-i merkūmu bi’t-tamâm yedinden ahz edip mebî‘-i merkūmu mahallinde kabza müşterî-i merkūm İstamo [Dimo]’yu taslît eyledim dedikde mukırr-ı merkūmu ikrâr-ı meşrûhunda el-mukarru lehü’l-merkūm İstamo [Dimo] vicâhen ve şifâhen tasdîk ve tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâmis aşer min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Yakub b. Kurd, Mehmed b. Mustafa, Ali b. Mustafa, Mustafa b. Veli, Mustafa b. Ahmed, Dimo v. Yani, Yorgi v. Dini, Kirih v. Hristo, Santo v. Duka, Duka v. Rado, Dimo v. Paroh, Duka v. Buga, Dimo v. Rado, Dimo v. Lipo, Dimo v. Pogal, Duka v. Rado, İstato v. Dimo, Dimo v. Lika, Nika v. Lika, Rizo v. Bazic, Dimo v. Yanaki.