Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 376 Hüküm no: 484 Orijinal metin no: [78a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yanaki v. Dimitri’nin menzilini Ahmed Beşe b. Aslan’a bey‘ bi’l-vefâ yoluyla sattığı Havâss-ı Refî‘a kazâsı müzâfâtından Küçükköy demekle ma‘rûfe olan karyede sâkin Yanaki v. Dimitri nâm zimmî mahfil-i kazâda işbu bâ‘isü’l-kitâb Ahmed Beşe b. Aslan muvâcehesinde takrîr-i kelâm edip karye-i mezbûrede vâki‘ bir tarafı Karagöz bağı ve bir tarafı İskarlet bağı ve iki tarafı tarîk-i âm ile mahdûd tahmînen dört dönüm bir kıt‘a mülk bağımı mezbûr Ahmed Beşe’ye on bin nakd-i râyic fi’l-vakt fıddî akçeye bey‘ bi’l-vefâ tarîki üzre bey‘ edip ol dahi vech-i muharrer üzre iştirâ ve kabûl eyledikden sonra meblağ-ı merkūm on bin akçeyi bi’t-tamâm ve’l-kemâl yedinden ahz ve kabz edip meblağ-ı mezbûru târih-i kitâbdan yedi ay tamâmına değin mezbûr Ahmed Beşe’ye edâ eylemezsem mebî‘-i mezbûr bâtta münkalib olup merkūm Ahmed Beşe’nin mülkü olmak üzre müvâ‘ade eyledik dedikde mezbûr Yanaki’nin takrîr-i meşrûhunu merkūm Ahmed Beşe vicâhen tasdîk ve şifâhen tahkīk etmeğin mâ vaka‘a bi’t-taleb ketb olundu. Fi’l-yevmi’s-sâbi‘ aşer min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Mustafa b. İdris, Yusuf b. Hüdâverdi, Mustafa b. Veli, Piyâle b. Abdullah, Mehmed b. Çırak, Yakub b. Kurt, Mahmud b. Ahmed, Mustafa b. Ahmed.