Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 376 Hüküm no: 485 Orijinal metin no: [78a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zoto v. Yani’nin zeytin ağaçları ile keçilerini Nikola v. Dimo’ya sattığı Vilâyet-i Rumeli’nde Delvine kazâsına tâbi‘ Tarakat nâm karye sâkinlerinden Zoto v. Yani nâm zimmî meclis-i şer‘-i hatîr-i lâzımü’t-tevkīrde işbu hâmilü’s-sifr Nikola v. Dimo nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûrede vâki‘ beynimiz[de] ma‘lûm beş dip zeytin eşcârını ve sekiz re’s keçiyi mezbûr Nikola’ya fıddî nakd-i râyic fi’l-vakt bin dokuz yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr bin dokuz yüz akçeyi bi’t-tamâm ve’l-kemâl mezbûr Nikola yedinden ahz ve kabz edip zikr olunan zeytin eşcârı ve keçileri mahallinde ahz ve kabz ve tasarrufa mezbûr Nikola’yı taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’r-râbi‘ aşer min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Mehmed b. Ahmed, Mustafa b. Abdullah, Mustafa b. Ahmed, Yakub b. Kurt, Todor v. Niko, Hristo v. İstato, Papa Yorgaki v. Kiti, Zoto v. Kiro, Mihal? v. Yani, Foti v. Hristo, Zafir v. Papa, Yani v. Nikola, Piyo v. Lazar.