Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 377 Hüküm no: 486 Orijinal metin no: [78a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. TerBeşe’nin menzil hissesini İsa b. Budak’a sattığı Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Fethullah Çelebi mahallesinde sâkin iken bundan akdem müteveffâ olan İbrahim’in verâseti zevce-i metrûkeleri ve vâriseleri Mümine ve Âişe’ye ve sulbî oğulları Ahmed ve Hasan’a ve sulbiye kızları Terbeşe ve Fâtıma ve Emine ve Bâşe’ye münhasıra olup kable’l-kısme mezbûr Ahmed dahi müteveffâ olup verâseti vâlidesi mezbûre Âişe’ye ve li eb karındaşı mezbûr Hasan’a [78b] ve li eb kız karındaşlar mezbûretân Terbeşe ve Fâtıma ve Emine ve Bâşe’ye münhasıra olup kable’l-[kısme] mezbûr Hasan dahi müteveffâ olup verâseti vâlidesi merkūme Mümine’ye ve li ebeveyn kız karındaşları mezbûretân Terbeşe ve Fâtıma ve Emine ve Bâşe’ye münhasıra olup kable’l-kısme mezbûre Mümine dahi müteveffât olup verâseti sadriye kızları mezbûretân Terbeşe ve Fâtıma ve Emine ve Bâşe’ye münhasıra olduğu şer‘an müte‘ayyin ve menzil-i âti’z-zikrin bi tarîki’l-münâsaha tashîh olunan on bir bin beş yüz yirmi sehimden bin yüz kırk sehmi mezbûre Âişe’ye ve iki bin beş yüz doksan beş sehmi mezbûre Terbeşe’ye ve iki bin beş yüz doksan beş sehmi mezbûre Fâtıma’ya isâbet eylediği şer‘an mütebeyyin oldukdan sonra mezbûre Terbeşe mahfil-i kazâda işbu hâmilü’l-kitâb İsa b. Budak nâm kimesne mahzarında bi tav‘ihâ ikrâr ve takrîr-i kelâm edip müteveffâ-yı mezbûr İbrahim’in mahalle-i mezbûrede vâki‘ bir tarafdan el-Hâc Hasan b. Mehmed mülkü ve bir tarafdan ba‘zan Sirkeci Emir vakfı ve ba‘zan tarîk-i âm ve iki tarafdan mekābir-i müslimîn ile mahdûd bir bâb fevkānî ve bir bâb tahtânî iki beyti ve bi’r-i mâyı ve muhavvata-i zât-ı eşcâr-ı müsmire ve gayr-ı müsmireyi müştemil mülk menzilinden bi tarîki’l-münâsaha on bir bin beş yüz yirmi sehimden bana isâbet eden iki bin beş yüz doksan beş sehim hisse-i şâyi‘amı, mezbûr İsa’ya iki bin nakd-i râyic fi’l-vakt akçe[ye] tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm eyledikden sonra semen-i mezbûr iki bin akçeyi yedinden bi’t-tamâm ve’l-kemâl ahz ve kabz eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sâbi‘ aşer min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: İbrahim Efendi b. Mustafa el-İmâm, Mahmud b. İbrahim, Hasan b. Ali, Mahmud b. Mustafa, Musa b. Zülfikār, Muzaffer b. Receb, el-Hâc Abdünnebi b. Turgud, Mehmed b. Ahmed.